Qańtar-mamyr aralyǵynda ishek ınfektsııalaryna shaldyǵý 15,7 paıyzǵa tómendegeni baıqaldy
ASTANA. 13 maýsym. QazAqparat - Qazaqstanda jyldyń basynan bastap 5 aıdyń ishinde asqynǵan ishek ınfektsııasymen aýyrý deńgeıiniń ótken jyldyń sáıkes kezeńimen salystyrǵanda15,7 paıyzǵa tómendegeni baıqalǵan.
QR Premer-Mınıstri resmı saıtynyń habarlaýynsha, bul týraly QR Densaýlyq saqtaý mınıstrliginiń Memlekettik sanıtarlyq-epıdemıologııalyq komıteti tóraǵasynyń orynbasary Aıjan Esmaǵambetova málim etken.
«Aǵymdaǵy 5 aıda ótken jylmen salystyrǵanda asqynǵan ishek ınfektsııasymen aýyrý jalpy alǵanda elimiz boıynsha 15,7%-ǵa tómendegen», - dedi A.Esmaǵambetova.
Sonymen qatar, ol sanıtarlyq-epıdemıologııalyq jaǵdaıdy baqylaý sheńberinde apta saıyn sý, azyq-túlik jáne jer sııaqty qorshaǵan orta nysandarynyń jaǵdaıyn zerthanalyq qadaǵalaý júrgiziletinin atap ótti.
Komıtet basshysy orynbasarynyń aıtýynsha, erte pisken jemis-jıdek ónimderin satý maýsymynan bastap jemis-jıdekterdiń 5 myńnan astam synamasy zerttelgen, oǵan qosa synamalardyń 2,3%-nyń quramynda nıtrat mólsheriniń shekten tys kóp bolýy baıqalǵan.
Nezinen alǵanda sapasy tómen ónimder Qytaıdan, Ózbekstannan, Reseıden, Lıtvadan, sonymen birge Jambyl jáne Ońtústik Qazaqstan oblystarynan ákelinedi.
Jáne de, asqynǵan ishek ınfektsııalarymen aýyrýdyń aldyn alý aıasynda saýda nysandaryn tekserý barysynda 100 tonnadan astam azyq-túlik tutynýǵa jaramsyz dep tabyldy.
Komıtettiń málimetinshe, 43 tonnaǵa jýyq sút jáne sút ónimderi, 14 tonna et jáne 10 tonna kondıterlik ónim jaramsyz dep tanylyp, joıyldy.
