Qańtar-qazanda syrtqy saýda aınalymy 111 mlrd dollardy qurady - Úkimet
«Halyqaralyq óndiristik-kóliktik jáne logıstıkalyq baılanystardyń buzylýy jahandyq ekonomıkaǵa keri áserin tıgizip otyr. Kóptegen elde ınflıatsııanyń rekordtyq kórsetkishi qalyptasýda. Álemdik ekonomıka ósimi baıaýlap keledi. Qazaqstanda qańtar-qarashada ekonomıkanyń ósý qarqyny 2,7 paıyz deńgeıinde boldy. Aýyl sharýashylyǵy, aqparat jáne baılanys, qurylys, óńdeý ónerkásibi, saýda, kólik jáne qoımalaý salalary 4 paıyzdan astam ósim kórsetýde. Ekonomıka ósiminiń baıaýlaýy munaı jáne taý-ken óndiristerindegi baıaýlaýmen baılanysty. Osy jyldyń qańtar-qazanda syrtqy saýda aınalymy 34 paıyzǵa ósip, 111 mlrd dollardy qurady. Eksport 45 paıyzǵa, sonyń ishinde óńdelgen taýarlar eksporty 35 paıyzǵa ósti. Oń saýda balansy 2 esege ulǵaıyp, 31 mlrd dollardy qurady», - dedi Úkimet basshysy.
Onyń atap ótýinshe, negizgi kapıtalǵa salynǵan ınvestıtsııa kólemi 6,6 paıyzǵa artty. Ekonomıkanyń negizgi salalary boıynsha ınvestıtsııalar aǵyny bilim berý salasynda, saýdada, kólik jáne qurylysta, logıstıkada, aýyl sharýashylyǵynda, ónerkásipte edáýir ósti.
«Inflıatsııa jyldyq kóriniste qarashada 19,6 paıyzdy qurady. Onyń negizgi faktorlary – geosaıası shıelenistiń kúsheıýi, álemdegi baǵanyń rekordtyq ósýi, Reseı rýbliniń nyǵaıýy, logıstıkanyń buzylýy jáne kórshi elderde keıbir taýarlardyń eksportyna ýaqytsha shekteýlerdiń engizilýi. Úkimet ınflıatsııany baqylaý jáne tómendetý boıynsha sharalar keshenin iske asyrýda. Onyń aıasynda jedel jáne orta merzimdi is-sharalar kózdelgen. Olar ishki naryqtaǵy otandyq taýarlardyń úlesin arttyrýǵa, taýarlardy saqtaý jáne tasymaldaý tetikterin damytýǵa, baǵa belgileýdi baqylaýǵa, monopolııaǵa qarsy jáne syrtqy saýdany retteýge baǵyttalǵan», — dedi Álıhan Smaıylov.
