Qańtar qasireti: 728 adam tergeý ızolıatorynda otyr

NUR-SULTAN. QazAqparat – Qańtar oqıǵalaryna qatysty 728 adam tergeý ızolıatorynda otyr. Bul týraly QR Qylmystyq-atqarý júıesi komıteti tóraǵasynyń orynbasary Meıram Aıýbaev aıtty, dep habarlaıdy QazAqparat tilshisi.

«Búgingi kúni tergeý ızolıatorlarynda 728 adam qamaýda otyr. Olardyń barlyǵy aýyr jáne asa aýyr qylmystar jasady degen kúdikke ilindi. Taǵylǵan aıypqa baǵa berý sottyń quzyryna jatady jáne usynylǵan dálelderdiń negizinde beriledi. Ol: beınejazbalar, kýálardyń aıǵaqtarymen jáne basqa materıaldar», - dedi tóraǵa orynbasary Іshki ister mınıstrliginiń baspasóz qyzmeti alańynda ótken brıfıngte.

Onyń atap ótýinshe, qańtarda Almatyda jáne basqa da birqatar oblys ortalyqtarynda tonaýlar oryn aldy. Ǵımarattar men avtokólikter órtelip, beıbit turǵyndarǵa zorlyq-zombylyq, polıtsııa jáne áskerı qyzmetkerlerge shabýyl jasaldy.

«Osy kezeńde elimizde kóptegen ǵımarattar tonalyp, órteldi, júzdegen avtokólikter joıyldy. Memlekettik jáne jeke menshikke iri mólsherde materıaldyq zalal keltirildi», - dedi Meıram Aıýbaev.