Qańtar-qarashada elimizdegi bólshek saýda aınalymy 5 trln. 580,4 mlrd. teńgeni qurady
ASTANA. QazAqparat - 2015 jylǵy qańtar-qarashada elimizdegi bólshek saýda aınalymy 5 trln. 580,4 mlrd. teńgeni qurady. Bul kórsetkish 2014 jylǵy tıisti kezeńine 100,3 paıyzǵa teń bolyp otyr.
QR Ulttyq ekonomıka mınıstrliginiń Statıstıka komıtetiniń málimetterine qaraǵanda, 2015 jylǵy qańtar-qarashada saýda kásiporyndary arqyly taýarlardy ótkizý kólemi 2014 jylǵy qantar-qarashamen salystyrǵanda 2 trln 914,2 mlrd. teńgeni qurap, naqty máni 2,8 paıyzǵa tómendegen.
Derekterge qaraǵanda, bólshek saýda qurylymynda azyq-túlik emes taýarlar basym bolyp, bul bólshek saýdanyń jalpy kólemine 64,8 paıyzǵa jetken. Sonymen qatar, azyq-túlik emes taýarlardyń bólshek saýdada ótkizilýi ótken jyldyń tıisti kezeńimen salystyrǵanda 0,3 paıyzǵa ósse, azyq-túlik taýarlar - 0,2 paıyzǵa tómendegen.
«2015 jylǵy 1 jeltoqsanǵa bólshek saýdadaǵy saýdamen aınalysatyn kásiporyndardyń taýarlyq qorlarynyń kólemi 337,1 mlrd. teńgeni qurady. Olardyń saýdadaǵy kúnderi - 59 kúnge teń. Bólshek saýdanyń jalpy kólemindegi asa joǵary úles salmaqty 2015 jyly qańtar-qarashada respýblıka boıynsha Almaty qalasy (27,7%), Astana qalasy (10,7%) jáne Qaraǵandy oblysy (9,3%) ıelenip otyr», delingen baspasóz baıanynda.
