Qańtar aıynda respýblıka boıynsha 81 myń adam jumysqa qabyldanyp, túrli sebeptermen 74,1 myń adam jumystan ketken
ASTANA. Aqpannyń 12-si. QazAqparat /Qanat Mámetqazyuly/ - Jedel derekterge sáıkes, 2010 jyldyń qańtar aıynda elimizdegi iri jáne orta kásiporyndarǵa, uıymdarǵa 81 myń adam jumysqa qabyldanǵan, túrli sebeptermen 74,1 myń adam jumystan bosatylǵan.
Bul týraly QazAqparat Statıstıka agenttigine silteme jasap habarlaıdy.
Qazaqstannyń iri jáne orta kásiporyndaryndaǵy jumys kúshiniń qozǵalysy týraly Statıstıka agenttiginiń usynǵan derekterine qaraǵanda, jumystan ketken qyzmetkerlerdiń arasynda óz erki boıynsha bosatylǵandar - 70,3 paıyzdy, qyzmetkerler sanynyń qysqartylýyna baılanysty bosap qalǵandar - 3,4 paıyzdy, basqa sebepter boıynsha qysqarǵandar 26,3 paıyzdy qurap otyr.
Aǵymdaǵy jylǵy qańtar aıynda jumysqa qabyldaý boıynsha aınalym koeffıtsıenti 2,8 paıyzdy qurasa, jumystan bosatý boıynsha aınalym 2,5 paıyzǵa teń bolyp otyr. Bul rette kadr turaqsyzdyǵy 1,8 paıyzdy kórsetken. Sonymen birge qańtar aıynda jumystan bosatylǵan qyzmetkerlerdiń ishinde 109,4 paıyzy qaıta qabyldanǵan kadrlarmen tolyqtyryldy.
