Qańtar aıynda Qazaqstan halqynyń sany 22,2 myń adamǵa ulǵaıdy
ASTANA. 14 naýryz. QazAqparat - Qańtar aıynda Qazaqstan halqynyń sany 22,2 myń adamǵa artyp, 2013 jyldyń 1 aqpanyna shaqqanda 16 mln. 934,1 myń adamdy qurady. Statıstıka agenttiginiń málimetterine qaraǵanda, qańtar aıynda halyqtyń tabıǵı ósimi 22 164 adamdy qurasa, bul kórsetkish 2012 jyldyń qańtarynda - 21 582 adamdy quraǵan bolatyn.
Eldegi demografııalyq ahýal basqa sıpattamalar boıynsha esepti kezeńde bylaısha qalyptasty - bala týý 36 225 adam (2012 jylǵy qańtarda - 35 130), kisi ólimi - 14 061 adam (2012 jyly qańtarda 13 548). Sonymen qatar, aǵymdaǵy jyldyń qańtar aıynda respýblıkada 10 963 neke qıyldy (2012 j. qańtarda - 11 011). Al esepti kezeńde 4 236 ajyrasý oqıǵasy tirkeldi (3 901).
2013 jyldyń qańtar aıynda Qazaqstannan 1 475 adam (2012 jyldyń qańtarynda 1 824) basqa elderge kóship ketse, elimizge - 1 545 adam (byltyrǵy jyly 3 404) qonys aýdarǵan.
