Qańtar aıynda elimizdegi ónerkásip oryndarynyń iskerlik belsendiligi tómendegen
ASTANA. Aqpannyń 12-si. QazAqparat /Qanat Mámetqazyuly/ - 2010 jyldyń qańtar aıynda elimizdegi ónerkásip kásiporyndarynyń iskerlik belsendiligi ótken aımen salystyrǵanda birshama tómendegen.
QR Statıstıka agenttigi tarapynan zerttelgen ónerkásip kásiporyndarynyń qorytyndysy osylaı bolyp otyr, dep habarlaıdy QazAqparat.
Agenttik málimetterine qaraǵanda, zertteýge qatysqan ónerkásip kásiporyndarynyń basshylary daıyn ónimge suranystyń azaıýyn atap ótken, bul olardyń iskerlik belsendiliginiń kemýine sebepshi bolǵan kórinedi. Sonymen, 2010 jylǵy qańtarda ónerkásip kásiporyndarynyń iskerlik belsendiligin sıpattaıtyn kásipkerliktiń senimdilik ındeksi ótken aımen salystyrǵanda 1 paıyzdyq tarmaqqa kemip, (+4) paıyzdy qurap otyr (maýsymdyq faktor esebimen).
Sondaı-aq zertteý barysynda kásiporyn basshylary jaqyn keleshekte, 2010 jyldyń sáýirine deıin, iskerlik belsendiliktiń ósýin kútetinin atap ótken. Bul boıynsha, kásipkerliktiń senimdilik ındeksi 2010 jylǵy qańtarmen salystyrǵanda 3 paıyzdyq tarmaqqa ósip, (+7) paıyzdy qurady.
2010 jylǵy qańtarda ótken aımen salystyrǵanda saýda kásiporyndary basshylarynyń baǵalaýlary boıynsha tutynýshylar suranysynyń kemýi baıqalady. Jaqyn aradaǵy 2-3 aıda respondentter óz kásiporyndarynyń ekonomıkalyq ahýalynyń jaǵymdy ózgeristerin kútetindigin atap kórsetken. Bul rette tutynýshylyq suranystyń azaıýy kásiporynnyń iskerlik belsendiliginiń kemýine sebepshi bolǵanǵa uqsaıdy. Sonymen, 2010 jylǵy qańtarda saýda kásiporyndarynyń iskerlik belsendiligin sıpattaıtyn kásipkerliktiń senimdilik ındeksi qarashamen salystyrǵanda 2 paıyzdyq tarmaqqa kemip, (+11) paıyzdy qurady (maýsymdyq faktor esebimen).
