Qańtar aıynda Astanada bolǵan eki adam óltirý qylmysy ashyldy
ASTANA. Qańtardyń 26-sy. QazAqparat /Jasulan Amanbaıuly/ - Qańtar aıynda Astanada eki adam óltirý qylmysy oryn alyp, onyń ekeýi de ashyldy.
Bul týraly búgin Astana qalalyq Іshki ister departamentinde ótken aptalyq brıfıng barysynda Krımınaldyq polıtsııa basqarmasynyń bastyǵy Marat Tólebaev málim etti, dep habarlaıdy QazAqparat.
Onyń aıtýynsha, byltyr da osyǵan sáıkes merzimde 3 adam óltirý oqıǵalary tirkelgen.
Sondaı qylmystardyń biri qańtardyń 6-sy kúni elordadaǵy «Dostyq» saıajaılarynyń birinde boldy. 1965 jyly týǵan qyrǵyz eliniń týmasy, Astana qalasynyń turǵyny G. esimdi azamat 1959 jyly týǵan Shortandy aýylynyń O. esimdi turǵynyna pyshaq salǵan. Olar «Dostyq» saıajaılarynyń birinde birge spırttik ishimdik iship otyrǵan jerde aralarynda daý týyp, onyń sońy tóbeleske ulasady. Sol kezde kúdikti jábirlenýshiniń moınyn pyshaqpen osyp jibergen. Kisiniń máıitin jasyrý maqsatynda deneni bólshektep, qańyrap turǵan bos saıajaılardyń biriniń jertólesine aparyp kómgen. Kúdikti adam qylmysyn moınyna alyp, tergeýshilerge oqıǵanyń qalaı bolǵandyǵyn aıtyp berdi.
M.Tólebaevtyń aıtýynsha, kúdikti buryndary sottalǵan. Eger onyń kinási tolyq dáleldense, sot ony 10-nan 20 jylǵa deıin nemese ómir boıy bas bostandyǵynan aıyrý jazasyna kesedi.
