Qańtar aıynda Almaty qalasynda iskerlik belsendilik tómendedi –UB
Ulttyq banktiń aqsha-kredıt saıasaty departamentiniń dırektory Jandos Shaımardanovtyń aıtýynsha, qańtar aıynda respýblıka boıynsha iskerlik belsendilik ındeksi tómendep, «50» kórsetkishinda turaqtaǵan. 2021 jyldyń jeltoqsanynda bul shama 50,6 edi.
Bul tujyrymdy Ulttyq bank mamany 459 kásiporynda júrgizilgen saýalnamanyń jaýaptaryn negizge ala otyryp shyǵarǵan.
«Indekstiń tómendýi qurylys salasy men qyzmet kórsetý sektorynda kórsetkishtiń 45,7 jáne 49,4-ke deıin tómendeýimen baılanysty boldy. Bul óz kezeginde jańa tapsyrystar kóleminiń jáne jumyspen qamtý deńgeıiniń tómendeýimen túsindiriledi. Ónerkásipte kórsetkish joǵarylap, 51,8 deńgeıinde qalyptasty (2021 jylǵy jeltoqsanda – 50,7)», - deıdi Ulttyq bank ókili.
Aımaqtar arasynda 7 óńirde iskerlik belsendilik jaqsaryp, 10 óńirde nasharlaǵan. Neǵurlym joǵary deńgeı Soltústik Qazaqstan (60,7) jáne Túrkistan (54,4) oblystarynda tirkelse, neǵurlym tómen deńgeı Qyzylorda oblysy (44,1) men Almaty qalasynda (44,7) baıqalǵan.
«Qyzylorda oblysy men Almaty qalasynda iskerlik belsendilik úsh sektorda da tómendegenin atap ótken jón.
2022 jylǵy qańtarda aǵymdaǵy bıznes-jaǵdaı teris baǵalandy: oń jáne keri baǵalardyń aıyrmasy boıynsha jaýaptar teńgerimi (-)2,3 qurady.
Kásiporyndar suranystyń tómendegenin atap ótti: jaýaptar teńgerimi 2021 jylǵy aqpannan beri alǵash ret teris mánge ıe bolyp, (-)5,9 qurady. Infraqurylymnyń baǵalaýy da 2021 jylǵy qańtardan beri alǵash ret teris mánge ıe bolyp, (-)2,8 qurady. Baǵalaýdyń jaqsarýy tek bıznesti qorǵaý máselelerine qatysty boldy. Alaıda baǵa áli teris bolyp qalyp otyr (-2,3)», - dep jazady Jandos Shaımardanov.
Degenmen aldaǵy jarty jylǵa degen boljam optımıstik sıpatta deýgebolady.
«Bolashaq jaǵdaıdy baǵalaý 17,9 qurady (2021 jylǵy jeltoqsanda – 15,2). Sonymen qatar aǵymdaǵy bıznes jaǵdaıdyń baǵasy nasharlap, (-)2,3 qurady (2021 jylǵy jeltoqsanda (-)0,1). Nátıjesinde ekonomıka boıynsha bıznes ahýal ındeksi 7,5-ke deıin tómendedi (2021 jylǵy jeltoqsanda – 7,7).
2022 jyly qańtarda saýalnamaǵa 459 kásiporyn, sonyń ishinde qurylysta – 67, ónerkásipte – 175, qyzmet kórsetý salasynda – 217 nysan qatysty», - deıdi Ulttyq bank departamentiniń dırektory.