Qańtar aıynyń sońynda Pavlodarda 41 gradýsqa deıin aıaz bolady

PAVLODAR. KAZINFORM – «Qazgıdromet» RMK málimeti boıynsha, Ertis-Baıan óńirinde qańtar aıyndaǵy ortasha aýa temperatýrasy ádettegi normadan bir gradýsqa sýyq bolady.

«Qazgıdromet» RMK Pavlodar oblystyq fılıalynyń ókilderi 2026 jylǵy qańtarǵa arnalǵan konsýltatıvtik boljamǵa sáıkes, osy aıdyń ortasha temperatýrasy -14,4... -19,0°s sheginde kútiletinin habarlady.

Aıdyń alǵashqy onkúndiginde túnde aýa temperatýrasy -23... -28°S-den -30... -35°S-qa, kúndiz -13... -18°S-den -20... -25°S-qa deıin tómendeýi yqtımal. Odan keıin termometr baǵanasy sál kóterilip, túnde -13... -18°S, kúndiz -3... -8°S-ty quraıdy.

10 qańtardan keıin túnde -13... -18°S-tan -28°-33°S-qa deıin, kúndiz -3... -8°S-tan -18... -23 ° S-qa deıin aýytqıdy.

Al úshinshi onkúndikte naǵyz aıazdy kúnder bastalýy múmkin. Túnde temperatýra -33... -38°S, kúndiz -23... -28°S-qa deıin tómendese, oblystyń soltústiginde túnde -41°S, kúndiz -31°S-qa deıin aıazdatýy yqtımal. Arqanyń sary aıazf kóp uzamaı synyp, aýa temperatýrasy túnde - 28 °S-qa deıin, kúndiz -13… -18°S-qa deıin sýyq bolady.

– Qańtar aıynda túsetin ylǵaldyń mólsheri normaǵa jaqyn bolady dep kútilip otyr (norma: 11-18 mm). Qar, boran, sekýndyna 15-20 metrge deıingi jel alǵashqy onkúndiktiń sońynda, ekinshi onkúndiktiń basynda jáne aıdyń sońynda kútiledi. Tuman alǵashqy jáne úshinshi onkúndikterdiń basynda túsedi. Alǵashqy onkúndiktiń sońynda kóktaıǵaq bolýy yqtımal, - dep habarlady «Qazgıdromet» mekemesinen.

Eske sala keteıik, Almatyda áýe reısteri aýa raıynyń qolaısyzdyǵyna baılanysty keshigip jatyr.