Qańtar aıynda teńge nyǵaıdy - Ulttyq bank

Qańtar aıynyń qorytyndysy boıynsha teńge baǵamy 1 AQSh dollary úshin 518,2 teńgege deıin 1,3%-ǵa nyǵaıdy. Bul týraly Ulttyq bankten habarlady.

Derekke qaraǵanda, Qazaqstan qor bırjasyndaǵy saýda-sattyqtyń ortasha kúndik kólemi bir aıda 254 mln AQSh dollarynan 227 mln AQSh dollaryna deıin tómendedi. Saýda-sattyqtyń jalpy kólemi 4,5 mlrd AQSh dollaryn qurady.

- Qańtar aıynda Ulttyq qordan 850 mln AQSh dollaryna valıýta satyldy. Bul respýblıkalyq bıýdjetke transfertter bólýge, sondaı-aq «Taldyqorǵan-Úsharal» magıstraldyq gaz qubyryn salýǵa baǵyttalǵan ınfraqurylymdyq jobany qarjylandyrýǵa múmkindik berdi.

Ulttyq qordan satý úlesi jalpy saýda-sattyq kóleminiń 19%-yn nemese kúnine shamamen 43 mln AQSh dollaryn qurady. Ulttyq bank Ulttyq qordyń qarajatymen operatsııalar júrgizý kezinde naryqtyq beıtarap qaǵıdatyn saqtaıdy. Bul shetel valıýtasyn udaıy jáne birkelki satýdy bildiredi, - dep jazdy vedomstvodan.

Ulttyq bank Úkimettiń aldyn ala boljamdy ótinimderi boıynsha respýblıkalyq bıýdjetke transfert bólýge aqpanda Ulttyq qordan 550 mln AQSh dollarynan 650 mln AQSh dollaryna deıingi mólsherde valıýta satylady dep kútedi.

Ulttyq bank qańtarda zeınetaqy aktıvteriniń ınvestıtsııalyq portfeline AQSh dollaryn satyp alǵan joq. Aqpanda BJZQ-ǵa valıýta satyp alý josparlanbaıdy.

Qańtar aıynda Ulttyq bank otandyq altyn óndirýshi kásiporyndardan buryn satyp alynǵan altyndy satýdan túsken AQSh dollaryn ishki valıýta naryǵynda satý kózdeletin teńestirý tetigin endirýge sheshim qabyldady. Osy sheshim aıasynda qańtarda 244 mlrd teńge azaıtyldy. Aqpanda osy maqsatta balamasynda shamamen 250 mlrd teńge kóleminde valıýta satý kútiledi.

Ulttyq bank transparenttilik qaǵıdaty aıasynda valıýta naryǵynda júrgiziletin operatsııalar týraly tolyq aqparatty ashyp kórsetýdi jalǵastyrady. Qysqamerzimdi perspektıvada teńgeniń dınamıkasy naryqqa qatysýshylardyń kútýlerine, toqsandyq salyq tólemderine, álemdik naryqtardaǵy ahýalǵa jáne geosaıası jaǵdaıdyń ózgerýine baılanysty bolady. Ulttyq bank teńgerimsizdiktiń jınaqtalýyn boldyrmaıtyn jáne altyn-valıýta rezervteriniń saqtalýyn qamtamasyz etetin ıkemdi baǵam belgileý rejımin ustana beredi.

Aıta keteıik, Ulttyq bank 1,5 mlrd teńgeniń alaıaqtyqqa tán tranzaktsııalaryn buǵattady.