Qańtar: Almaty oblystyq polıtsııa departamentiniń eks-basshysy jumys ornyn tastap ketken

ASTANA. QazAqparat – Qańtar oqıǵasy kezinde birqatar óńirde UQK men Polıtsııa departamentteriniń basshylary qaramaǵyndaǵylarǵa jumys ornyn tastap ketý jóninde buıryq bergen. Bul týraly Bas prokýratýranyń «Qańtar oqıǵasy: Derek pen dáıek» derekti fılminde aıtyldy, dep habarlaıdy QazAqparat tilshisi.

Bas prokýratýra usynǵan fılmde Almaty oblystyq polıtsııa departamentiniń burynǵy basshysy Serik Kúdebaevtyń jumys ornyn tastap ketip bara jatqan vıdeosy jarııalanǵan.

«Myna kadrlardan Almaty oblystyq polıtsııa departamentiniń burynǵy bastyǵy, sol kezde komendant bolǵan Kúdebaevtyń mekeme ǵımaratyn tastap ketkenin kórýge bolady», - dep baıandalǵan fılmde.

Eske salsaq, Almaty oblystyq polıtsııa departamentiniń burynǵy basshysy Serik Kúdebaev qańtar oqıǵasy boıynsha kúdikti dep tanylǵan bolatyn. Ol 2020 jyldan bastap 2022 jyldyń qańtaryna deıin Almaty oblysynyń polıtsııa departamentiniń bastyǵy qyzmetin atqarǵan. 2022 jyldyń 18 aqpanynda ol ishki ister organdarynan óz erkimen bosatyldy.