Qańtar-aqpanda elimizde jalpy ishki ónim ósimi birshama jaqsardy

NUR-SULTAN. QazAqparat – 2021 jyldyń qańtar-aqpanynda jalpy ishki ónimniń ósý qarqyny mınýs 2,9 paıyzǵa deıin jaqsardy. Bul týraly búgin Úkimet otyrysynda QR Ulttyq ekonomıka mınıstri Áset Erǵalıev aıtty, dep habarlaıdy QazAqparat tilshisi.

«2021 jylǵy qańtar-aqpanda makroekonomıkalyq kórsetkishter oń úderisti kórsetti. Ken óndirý ónerkásibin esepke almaǵanda, naqty sektorda ósim 6,3 paıyzǵa deıin jedeldedi. Negizgi kapıtalǵa ınvestıtsııa ken óndirý ónerkásibin esepke almaǵanda, 13,3 paıyz ósti. Jyldyq ınflıatsııa 7,4 paıyz deńgeıinde saqtaldy. Ken óndirý ónerkásibinen basqa, naqty sektordyń barlyq salalary turaqty ósim kórsetti. Olar: qurylys, sýmen jabdyqtaý, óńdeý ónerkásibi, elektrmen jabdyqtaý jáne aýyl sharýashylyǵy salalary. Sonymen qatar, aqparat pen baılanys salasy 9,4 paıyzǵa artty», - dedi 2021 jyldyń qańtar-aqpanyndaǵy elimizdiń áleýmettik-ekonomıkalyq damý qorytyndysy jaıynda baıandaǵan mınıstr.

Onyń atap ótýinshe, osynyń nátıjesinde jalpy ishki ónimniń ósý qarqyny osy jylǵy qańtardaǵy mınýs 4,5 paıyzdan qańtar-aqpanda mınýs 2,9 paıyzǵa deıin jaqsardy.

«Óńdeý ónerkásibi salalarynda turaqty ósim saqtalýda. Ósýdiń jedeldeýi mashına jasaýda - 21,2, qurylys materıaldary óndirisinde - 22,9, hımııalyq ónimder óndirisinde - 14,1, plastmassa ónimderi óndirisinde - 14,2a, kıim óndirisinde - 19,9, jıhaz óndirisinde - 15,7, farmatsevtıkada 9,2 paıyzǵa deıin baıqalady. Joǵarǵy ósim avtomobıl qurastyrýda 19,6 paıyz deńgeıinde saqtaldy», - dedi Áset Erǵalıev.