Qańtar-aqpanda elimizde 13,3 mln. tonna munaı óndirildi
ASTANA. QazAqparat - 2015 jylǵy qańtar-aqpanda 2014 jylǵy sáıkes kezeńmen salystyrǵanda shıki munaı, tabıǵı gaz jáne tústi metall kenderiniń óndirisi ósti.
Bul týraly QR Ulttyq ekonomıka mınıstrligi Statıstıka komıtetiniń baspasóz qyzmetinen habarlandy.
Atap aıtqanda, 2015 jylǵy qańtar-aqpanda gaz kondensatyn qosa alǵanda munaı óndirý 13,3 mln. tonnany qurady. Bul ótken jylǵy kezeńmen salystyrǵanda 100,7 paıyzǵa teń. Al óndirilgen benzın 0,4 mln. tonnany qurap, byltyrǵa qaraǵanda 103,1 paıyzǵa joǵarylasa, dızeldik otyn 0,8 mln tonnaǵa jetip, 114,1 paıyzǵa artqan.
«Rezeńke jáne plastmassa buıymdary, ózge metall emes mıneraldyq ónimder, metallýrgııa ónerkásibi ónimderi jáne munaı óńdeý ónimderiniń óndirisi joǵarylady. Ónerkásiptik ónimderiniń óndiris kóleminiń ósýi respýblıkanyń 10 óńirinde baıqaldy. Sonymen bir mezgilde, kómir jáne biriktirilgen temir kenderiniń óndirisi tómendedi. Tamaq ónimderiniń, sýsyndardyń, temeki, qaǵaz jáne mashına jasaý ónimderiniń óndirisi qysqardy. Tómendeý Aqmola, Batys Qazaqstan, Jambyl, Mańǵystaý, Pavlodar jáne Shyǵys Qazaqstan oblystarynda tirkeldi», - delingen baspasóz baıanynda.
