Qańtar-aqpan aılarynda Qazaqstandaǵy ınflıatsııa 2,5 paıyzdy qurady

ASTANA. QazAqparat - 2016 jyldyń qańtar-aqpanynda Qazaqstan Respýblıkasynda ınflıatsııa 2,5 paıyzdy qurady. Bul týraly QR Ulttyq ekonomıka mınıstrligi Statıstıka komıtetiniń baspasóz qyzmetinen habarlandy.

Statıstıka málimetterine qaraǵanda, baǵa azyq-túlik taýarlaryna aǵymdaǵy jylǵy eki aıda 2,7 paıyz, azyq-túlik emes taýarlaryna - 1,8 paıyz, aqyly qyzmetterge - 2,8 paıyzǵa ósti. Al aǵymdaǵy jyldyń basynan baǵanyń ósýi jańa jınalǵan kókónisterge 8,7 paıyz, qantqa - 8,5 paıyz, qara shaıǵa - 6,2 paıyz, nanǵa - 5,8 paıyz, jumyrtqaǵa - 5,4 paıyzdy qurady. Sonymen qatar, jańa jınalǵan jemisterge baǵa 5,3 paıyzǵa, kúnbaǵys maıy 5 paıyzǵa, jarmalarǵa, keptirilgen jemister men jańǵaqtarǵa 3,9 paıyzdan, makaron ónimderine 3,6 paıyz, qus etine - 2,9 paıyzǵa ósken.

Baǵa ósimi farmatsevtıkalyq ónimderge 7,3 paıyz, turmystyq buıymdarǵa 3,5 paıyz, shyny jáne qyshtan jasalǵan ónimderge 3,1 paıyz, toqyma buıymdaryna - 2,7 paıyz, jýǵysh jáne tazalaǵysh quraldarǵa, jeke qoldanatyn taýarlarǵa - 2,5paıyz-dan, avtomobılderge - 2,3 paıyz qurady. Sonymen bir mezgilde, baǵa benzınge 0,8 paıyz, dızel otynyna 0,3paıyzǵa tómendedi.

«Turǵyn úı-kommýnaldyq qyzmetter salasynda tarıfter kárizge 9,4 paıyz, ortalyqtan jylytýǵa - 7 paıyz, ystyq sýǵa - 6,3 paıyz, qoqys shyǵarýǵa - 5,2 paıyzǵa, elektr energııasyna, sýyq sýǵa 4,4paıyzdan, taratý jelileri arqyly tasymaldanatyn gazǵa 4,2 paıyzǵa joǵarylady», - delingen baspasóz baıanynda.