Qant satýǵa esh shekteý engizbeımiz – mınıstrlik

NUR-SULTAN. QazAqparat – Qazaqstan Úkimeti qant satýǵa esh shekteý qoımaıdy. Bul týraly QR Saýda jáne ıntegratsııa mınıstrligi Saýda komıtetiniń tóraǵasy Erjan Qazanbaev aıtyp berdi, dep habarlaıdy QazAqparat tilshisi.

«Úkimet retinde biz eshqandaı shekteýler engizbeımiz. Saýda jelileri ózderinde tapshylyq bolmaý úshin óz saıasatyn júrgizedi, sondyqtan mundaı erejelerdi ózderi engizýi múmkin. Máselen, bir qolǵa 2-3 keliden artyq qant satpaý – tikeleı óz quqyqtary. Eger olar qanttyń kóp satylyp jatqanyn baıqasa jáne kelesi jetkizilim tek bir aptadan keıin kelse, dúrlikpe men tapshylyq týdyrmaý úshin ózderiniń ishki shekteý sharalaryn júrgize alady. Men saýda jelileri úshin pikir bildire almaımyn», - dedi Erjan Qazanbaev tilshilerge bergen suhbatynda.

Sonymen birge, Erjan Qazanbaev halyqtyń qajettiligin tolyq qamtamasyz etý úshin qant jetkilikti kólemde bolatynyn aıtty.

Buǵan deıin E. Qazanbaev elimizde qant tapshylyǵy joq ekenin aıtqan edi.

«Keıbir saýda jelilerine qant sál kesh túsip, belgili bir aralyqta qant bolmaýy múmkin. Qant tapshylyǵy joq jáne ol bolmaıdy da», - dep túsindirdi komıtet tóraǵasy.

Statıstıka kórsetkendeı, ótken aptada qanttyń ortasha baǵasy 450-470 teńge bolǵan.