Qant óndirýshilerge qosylǵan qun salyǵy boıynsha jeńildik merzimi uzartylmaq

ASTANA. QazAqparat – Balyq óńdeýshilerge qosylǵan qun salyǵyn 70 paıyzǵa azaıtý týraly norma usynylady. Bul týraly Májilistiń jalpy otyrysynda salyq máselesine arnalǵan zań jobasyn talqylaý kezinde QR Ulttyq ekonomıka mınıstri Álibek Qýantyrov aıtty, dep habarlaıdy QazAqparat tilshisi.

«Túzetýlerdiń kelesi blogy otandyq taýar óndirýshilerdi yntalandyrýǵa baǵyttalǵan. Balyq aýlaý kásiporyndary balyq óńdegen kezde qosylǵan qun salyǵyn 70 paıyzǵa azaıtý týraly norma usynylady. Qazir mundaı jeńildikti balyq ósirýshi qojalyqtar qoldanady», - dedi Á. Qýantyrov.

Budan bólek ol qant óndirisin yntalandyrý úshin qant quraǵy ımportyn qosylǵan qun salyǵynan bosatý, sondaı-aq qant óndirýshiler úshin qosylǵan qun salyǵy boıynsha jeńildiktiń qoldanylý merzimin uzartý usynylyp otyrǵanyn aıtty.

«Kelesi norma tazartylǵan altyndy satýǵa qatysty. Qazir Ulttyq bankke mundaı altyndy satý qosylǵan qun salyǵynan bosatylady. Osy normany altyndy zergerlerge de satý kezinde qoldaný usynylady», - dep naqtylady mınıstr.

Atap aıtqanda, búgin palata depýtattary «Salyq jáne bıýdjetke tólenetin basqa da mindetti tólemder týraly» Kodeksine jáne «Salyq jáne bıýdjetke tólenetin basqa da mindetti tólemder týraly» Kodeksin qoldanysqa engizý týraly» Zańyna ózgerister men tolyqtyrýlar engizý týraly» zań jobasyn birinshi oqylymda qarap jatyr. Qujat Úkimettiń zań jobalaý jumystarynyń josparyna sáıkes jáne Memleket basshysynyń tapsyrmalaryn iske asyrý úshin ázirlendi.