Qant óndirýge tóleıtin sýbsıdııa artqan saıyn jergilikti mazmun azaıa túsken

ASTANA. QazAqparat – Keıingi úsh jylda qant óndirýge tóleıtin sýbsıdııa artqan saıyn jergilikti mazmun azaıa túsken. Májilistegi Úkimet saǵatynda Agrarlyq máseleler komıtetiniń tóraǵasy Serik Egizbaev osyndaı tendentsııa qalyptasqanyn jetkizip, muny «paradoks» dep atady, dep habarlaıdy QazAqparat tilshisi.

«Mınıstr óz baıandamasynda jemis-kókónis ónimderin óńdeý salasynda 93 mlrd astam teńgege 30 joba iske asatynyn atap ótti. Alaıda búgingi tańda qosylǵan quny joǵary ónimniń úlesi - sala boıynsha 1,5% ǵana. Budan tómen qaıda baramyz? Qant boıynsha da jaǵdaı óte kúrdeli. Respýblıka daıyn ónimnen de, shıkizattan da ımportqa tolyqtaı derlik táýeldi. Otandyq ónidiris úlesi 10% da jetpeıdi. Slaıdta kórsetilgendeı, qant baǵasy sońǵy 4 jylda 213 teńgeden 442 teńgege deıin ósip, eki eseden asa qymbattady», - dedi Májilis depýtaty.

Onyń deregi boıynsha, Úkimettiń qant salasyn damytýǵa arnalǵan keshendi jospary 495 mlrd teńgeni qajet etedi.

«Byltyr 3,6 mlrd teńge kóleminde sýbsıdııa ıgerildi. Bıyl 14,1 mlrd teńge bólindi. Alaıda, osyndaı qomaqty memlekettik qoldaýǵa qaramastan, damý úrdisi teris dınamıkany kórsetip otyr. Mysalǵa, 2020 jyly otandyq shıkizat negizinde ishki suranystyń 9% ǵana qamtamasyz etilgen bolsa, 2021 jyly - 7 %, al 2022 jyly - 6 % deıin tómendedi. Paradoks: aqshany kóbirek ıgeremiz, ónimdi azyraq alamyz. Osy oraıda Úkimetke atalǵan máseleni sheshýdiń balama joldaryn qarastyrýdy usynamyz», - dedi komıtet tóraǵasy.