Qant naryǵynyń 70%-dan astamy ımportqa táýeldi
ASTANA. KAZINFORM – Básekelestikti qorǵaý jáne damytý agenttigi eldegi qant naryǵyna taldaý júrgizýdi aıaqtady. Jumys qorytyndysy boıynsha 2025 jyldyń qorytyndysynda ishki naryqtaǵy ımporttyq qanttyń úlesi 70,4%-ǵa jetken, al otandyq óndiris ishki tutynýdyń tek 29,6%-yn qamtamasyz etedi.
Bul ishki óndiristi damytý boıynsha qabyldanyp jatqan sharalarǵa qaramastan, Qazaqstannyń qant salasy burynǵysynsha ımportqa táýeldi ekenin kórsetedi. Іshki suranystyń negizgi bóligi ımporttyq shıki qamys qantyn óńdeý jáne daıyn ımporttyq qant jetkizý esebinen qamtamasyz etiledi.
— 2022–2026 jyldarǵa arnalǵan Qant salasyn damytý jónindegi keshendi jospardyń jáne Agroónerkásiptik keshendi damytý tujyrymdamasynyń birqatar nysanaly kórsetkishine qol jetkizilgen joq. Atap aıtqanda, bul qant qyzylshasynyń egis alqaptary, jalpy túsim, qant óndirý kólemi jáne ishki naryqtyń ózin-ózi qamtamasyz etý deńgeıi boıynsha kórsetkishterge qatysty. Sonymen qatar, 2024 jyly qant qyzylshasynan rekordtyq ónim alynǵanyna qaramastan, bul qaıta óńdeý kásiporyndarynyń qýattaryn tolyq kólemde paıdalanýǵa múmkindik bermedi. Sebebi qoldanystaǵy óndiristik qýattardyń qurylymy aıtarlyqtaı dárejede ımporttyq qamys shıki qantyna baǵdarlanǵan. Bul shıkizat bazasy men qaıta óńdeý qýattaryn damytý arasyndaǵy teńgerimsizdiktiń saqtalyp otyrǵanyn kórsetedi, — delingen Básekelestikti qorǵaý jáne damytý agenttigi habarlamasynda.
Taldaý qanttyń bırjalyq saýdasynyń qoldanystaǵy modeliniń tıimdiligin arttyrý jáne taýar bırjalary týraly zańnama talaptarynyń saqtalýyna Saýda jáne ıntegratsııa mınıstrligi tarapynan baqylaýdy kúsheıtý qajettigin kórsetti. Jekelegen otandyq óndirýshilerde óndiris kóleminiń ulǵaıýy taýar bırjalary arqyly ótkizý kóleminiń tıisti ósýimen qatar júrmegeni anyqtaldy. Sondaı-aq otandyq jáne ımporttyq qanttyń aınalymy úshin biryńǵaı jaǵdaılardy qamtamasyz etý qajet. Budan bólek, ımporttalǵan qanttyń keıinnen úshinshi elderge áketilýiniń jekelegen jaǵdaılary anyqtalǵan, bul taýar aǵyndarynyń ishki naryqty qamtamasyz etýge yqpalyn qosymsha baǵalaýdy talap etedi.
— Taldaý qorytyndysy boıynsha BQDA qantty kóterme saýdada ótkizetin sýbektilerge monopolııaǵa qarsy zańnamany buzý belgileri boıynsha 9 habarlama engizdi. Múddeli memlekettik organdarǵa otandyq shıkizat bazasy men qaıta óńdeý qýattaryn damytý, qant zaýyttary men qant qyzylshasyn ósiretin sharýashylyqtar arasynda uzaq merzimdi kelisimshart jasaýdy engizý, bırjalyq saýdaǵa baqylaýdy kúsheıtý, qanttyń reeksportyn monıtorıngteý, sondaı-aq ishki naryqtyń ımportqa táýeldiligin tómendetý boıynsha usynystar joldandy. Tıisti usynymdardy jaýapty memlekettik organdardy bekite otyryp, qant naryǵyndaǵy básekelestikti damytý jónindegi Jol kartasyna engizý usynylady, — delingen habarlamada.
Aıta ketelik Qazaqstan qalalarynda qant baǵasy qansha ekenin jazǵan edik.
