Qant, qyryqqabat, kúrish, taýyq eti nege qymbattaýda - mınıstr jaýaby

ASTANA. QazAqparat - Qant, qyryqqabat, kúrish, taýyq eti qymbattap jatyr. Bul týraly búgin Úkimettiń selektorlyq rejımdegi otyrysynda QR Ulttyq ekonomıka mınıstri Tımýr Súleımenov aıtty, dep habarlaıdy QazAqparat tilshisi.

«Ótken aptamen salystyrǵand,  baǵalardyń ındeksi 0,2 paıyzǵa ósti. Jyldyń basynan beri baǵalardyń joǵarlaýy 1,9 paıyzdy qurap otyr. Baǵlalardyń ósýi  qant, qyryqqabat, kúrish, taýyq eti sııaqty azyq-túlik ónimderinde baıqalýda. Azyq-túlik taýarlary baǵalarynyń negizgi ósý sebepteri EAEO naryǵynda ónimderdiń qymbattaýy, sondaı-aq ózindik qun qurylymyndaǵy ústeme shyǵystardyń ósýi bolyp tabylady», - dedi ol.

Osy oraıda, mınıstr qant, qyryqqabat, kúrish, taýyq etiniń qymbattaýyna ne túrtki bolyp otyrǵandyǵyn da ashyq aıtty.

«Qazaqstandyq qanttyń eleýli bóligi ımporttyq shıki qanttan óndiriledi. Osyǵan baılanysty, qanttyń ishki baǵalary qant naryǵyndaǵy jalpy álemdik úrdisterdiń jáne birinshi kezekte Reseı Federatsııasynyń naryǵyndaǵy jaǵdaıdyń áserinen ósip keledi. Aǵymdaǵy jylǵy 9 aıda qyryqqabat eksporty ulǵaıyp, 18,6 myń tonnany qurdy. Osyǵan baılanysty, qyryqqabattyń baǵasy basqa kókónistermen salystyrǵanda aıtarlyqtaı ósti. Maýsymdylyq pen saqtaý shyǵyndaryna baılanysty baǵa aldaǵy ýaqytta da ósýi múmkin», - dedi mınıstr.

Al T.Súleımenovtiń sózine sensek, kúrish baǵasynyń artýyna janar-jaǵarmaı men kommýnaldyq shyǵystar baǵalarynyń kóterilýi sebep bolǵan.

«Taýyq etine baǵanyń ósýi, negizinen, qus etiniń shamamen 50 paıyzy AQSh-tan ımporttalatynyna baılanysty. AQSh dollary baǵamynyń ósýi ımporttalatyn taýyq etiniń qymbattaýyna alyp kelýde. Buǵan deıin reseılik kúnbaǵys maıyn Túrkııaǵa eksporttaý boıynsha baj salyǵy 36%-dy qurady. Osy baj salyǵynyń kúshi joıylǵannan keıin reseılik kúnbaǵys maıynyń eksporty túrik naryǵyna qaıta baǵyttaldy», - dedi mınıstr.