Qant qyzylshasy, metall buıymdar, tyńaıtqyshtar – Jambylda qandaı iri zaýyttar ashylady
ASTANA. KAZINFORM – 2029 jylǵa deıin Jambyl oblysynda 4,1 trln teńgege 62 ınvestıtsııalyq joba iske asyrylady jáne 8,3 myń jumys orny qurylady. Bul týraly Jambyl oblysynyń ákimi Erbol Qarashókeev esep berý brıfınginde aıtty.
Jyl basynan beri oblys ekonomıkasyna 553,6 mlrd teńge ınvestıtsııa tartylǵan, onyń 82% jeke menshik qarajat. Bıyl 161 mlrd teńgege 26 ınvestıtsııalyq joba iske asyrylady jáne 1,1myń jumys orny qurylady.
— Qazir SHENGTAI BIOTECH qýaty jylyna 3 mln tonna júgerini tereńdetip óńdeıtin biregeı jobany bastady. YONGGANG IRON AND STEEL GROUP jylyna 3 mln tonnaǵa deıin prokat metall buıymdaryn óndiretin zaýyt ashady. EVROHIM tyńaıtqysh óndirý kompanııasy jylyna 800 myń tonna kúkirt qyshqylyn óndiretin óndiristiń birinshi kezeńin iske qosady, — dedi E. Qarashókeev Ortalyq kommýnıkatsııalar qyzmetinde.
Sonymen birge, «ZHONGKAI KAZAKHSTAN INTERNATIONAL SUGAR INDUSTRY COMPANY» jylyna 1 mln tonna qant qyzylshasyn óńdep, 130 myń tonna qant, 72 myń tonna qyzylsha uny men 54 myń tonna melassa shyǵaratyn zamanaýı qant zaýytynyń qurylysyn bastaǵan.
QAZAQ SODA jylyna 1 mln tonna kaltsılendirilgen soda óndirisin qolǵa aldy.
Qordaı aýdanyndaǵy Gagarınskoe ken ornynda jylyna 500 myń tonna quramynda altyny bar ken óndiretin ShOQPAR-GAGARIN taý-ken baıytý kombınatynyń qurylysy júrip jatyr.
— ALTYNALMAS REAGENTS jylyna 25 myń tonna natrıı tsıanıdin óndire alady. KAZAKHSTAN HYDROGEN PEROXIDE — jylyna 30 myń tonna sýtek peroksıdin óndiredi. TOTAL EREN — energııa saqtaý júıesi bar qýaty 1 gıgavatt bolatyn jel elektr stantsııasyn, al MASDAR — 300 mVt energııa saqtaý júıesi bar jel elektr stantsııasyn salady. Osy iri ınvestıtsııalyq jobalardy iske asyrýdyń esebinen oblys ekonomıkasyna 3,8 trln teńge ınvestıtsııa tartylady, — dedi oblys ákimi.
Atalǵan jobalardyń basym bóligi «Jibek Joly» arnaıy ekonomıkalyq aýmaǵynda jáne «Taraz» ındýstrııalyq aımaǵynda ornalasqan.
Jambyl oblysy Qazaqstandy strategııalyq mańyzy bar hımııa ónimderimen 100% qamtamasyz etip otyr.