Qant qartaıý protsesin kúsheıtedi

ASTANA. KAZINFORM - Siz kúnine qansha qant jeısiz? Onyń mólsherine mán bergenińiz abzal. Óıtkeni mamandar qantty kóp mólsherde tutyný densaýlyqqa zııan deıdi.

Orta eseppen alǵanda adam kúnine 225 g qant tutynady eken. Bul aǵza úshin óte kóp. Barlyq taǵamnyń quramyndaǵy qantty qosa eseptegende onyń mólsheri kúnine 20-25 gramnan aspaýy tıis deıdi «Bizdiń dáriger» jobasyna suhbat bergen endokrınolog dárigerler.

Eger qantty shamadan tys kóp tutynsańyz, aǵzada artyq maı jınalady, qartaıý protsesi kúsheıedi, júrek-qan tamyr aýrýlary paıda bolady. Aǵzadan kaltsıı shaıylyp, V toby dárýmenderiniń sińirilýi tejeledi, al ımmýndyq júıeniń jumysy 17 ese tómendeıdi eken. Qantty kóp tutyný sondaı-aq qalqansha beziniń jumysyn tómendetip, nátıjesinde zat almasý protsesi buzylady. Artyq salmaqpen qant dıabetine shaldyqqan naýqastardyń jyl saıyn artýy da osy qantty kóp tutynýdyń saldary. Eger sizdi artyq salmaq, jıi kishi dáretke barý mazalasa, aýzyńyz qurǵap shól qyssa mindetti túrde dárigerge tekserilý kerek ekenin eskertken mamandar sońǵy jyldary balalar arasynda qant dıabetiniń 2 túri kóp kezdesip jatqanyn alǵa tartty.

Qant, árıne bizge ýaqytsha kúsh beredi, nátıjesinde adamda táýeldilik týyndaıdy. Kúndelikti tutynatyn taǵamdar quramynda da jasyryn qant bolady. Ony bilý úshin mindetti túrde taǵamdardyń qutysynda jazylǵan quramyna nazar aýdarý kerek. Gazdalǵan tátti sýsyn, aq unnan jasalǵan tátti ónimder men fast-fýd, tipti ketchýp pen maıonez quramynda da qant bolatynyn eskertken sarapshylar tabıǵı qant negizinen jemis-jıdekter men keptirilgen jemisterdiń quramynda kezdesetinin aıtty. Kúndelikti qajet qant mólsherin tek tabıǵı ónimderden alsaq, densaýlyqqa keri áseri bolmaıdy.