Qant dıabetimen aýyratyndar endi dárini tek MÁMS arqyly alady
ASTANA. KAZINFORM — Densaýlyq saqtaý mınıstrligi qant dıabetin MÁMS júıesi arqyly ǵana qarjylandyrýdy josparlap otyr. Bul sheshim qoǵamda qyzý talqylanyp, turǵyndar áleýmettik jelide narazylyqtaryn bildirgen edi.
Qant dıabetimen aýyratyn naýqastar endi dári-dármekti qalaı ala alady? Densaýlyq saqtaý mınıstrligi Dári-dármek departamentiniń basqarma basshysy osy suraqqa jaýap berdi.
— 14 shildeden bastap, MÁMS júıesine jańartylǵan zań kúshine endi. Bul ózgeriske sáıkes, 2026 jyldan bastap qant dıabetimen aýyratyn patsıentter dárilik zattarmen MÁMS júıesi arqyly qamtamasyz etiledi. Qazirgi tańda naýqastardyń 96 paıyzy saqtandyrylǵan. Olardyń qataryna balalar, júkti áıelder, zeınetkerler men áleýmettik osal toptarǵa jatatyn azamattar da kiredi. Bul patsıentter úshin medıtsınalyq kómek pen tegin beriletin dárilik zattarǵa eshqandaı shekteý joq, — dedi Gúldeı Begalıeva Jibek Joly arnasynyń «Búgin LIVE» baǵdarlamasyna bergen onlaın-suhbatynda.
Dári-dármek departamentiniń basqarma basshysy saqtandyrylmaǵan azamattar men jumyssyzdardyń dári-dármekti tegin alý úshin ne isteýi kerektigin túsindirdi.
— Azamattar saqtandyrylý úshin bir jylǵa 50 myń teńgeden astam qarjy tóleýi kerek. Eger bul tólem jasalsa, dáriler tegin beriledi. Al jumys istemeıtin azamattar jumyssyz retinde resmı tirkelýi qajet. Sonda memleket olardy óz tarapynan qamtamasyz etedi, — dedi Densaýlyq saqtaý mınıstrliginiń ókili.
Aıta keteıik, birer kún buryn Densaýlyq saqtaý mınıstrligi dál osy máselege qatysty túsinikteme bergen edi.