Qant dıabetimen aýyratyn balalar sany tórt jylda 26 paıyzdan astam ósti

ASTANA. KAZINFORM – Qazaqstanda qant dıabetimen aýyratyn balalar men jasóspirimder sany tórt jylda 1435 adamǵa artqan. Bul týraly Densaýlyq saqtaý mınıstrligi Kazinform agenttiginiń resmı saýalyna bergen jaýabynda málimdedi.

dıabet
Foto: Pexels

Vedomstvo dereginshe, 2022 jyly elimizde 1–17 jas aralyǵyndaǵy 5387 bala qant dıabetimen esepte turǵan. 2023 jyly olardyń sany 5913-ke, 2024 jyly 6286-ǵa, al 2025 jyly 6822-ge jetken. Osylaısha, tórt jylda kórsetkish 26,6 paıyzǵa ósken.

– 2025 jylǵy derek boıynsha, qant dıabetimen aýyratyndardyń 4788-i 1–14 jas aralyǵyndaǵy balalar bolsa, 2034-i 15–17 jas aralyǵyndaǵy jasóspirimder, - delingen habarlamada.

Densaýlyq saqtaý mınıstrliginiń málimetinshe, 1-tıpti qant dıabeti negizinen balalar men jasóspirimderde kezdesedi. Al 2-tıpti dıabet kóbine 40–75 jas aralyǵyndaǵy azamattarda anyqtalady.

Qazaqstanda jarty mıllıonnan astam adam qant dıabeti dıagnozymen esepte tur.