Qant dıabeti kezinde aıaqqa erekshe kútim qajet - hırýrg keńesi
ALMATY. KAZINFORM – Aıaq kútimine kúndelikti kóńil bólý jáne dárigerge ýaqytyly qaralý qant dıabeti asqynýlarynyń aldyn alýǵa kómektesedi. Bul týraly Almaty qalasy №7 qalalyq klınıkalyq aýrýhananyń ınfektsııalyq hırýrgııa bóliminiń meńgerýshisi, hırýrg-dáriger Tóleıgúl Iskakova aıtty.
Qant dıabeti kezinde júıke ushtary zaqymdanyp, aıaqtaǵy qan aınalymy buzylýy múmkin. Sezimtaldyqtyń tómendeýine baılanysty adam jaraqattardy, kúıikter men teriniń qajalýyn birden baıqamaı jatady. Biraq teridegi kishkentaı zaqymnyń ózi aýyr ınfektsııaǵa jáne uzaq emdelýge ákelýi yqtımal.
- Dıabet kezinde aýyrsynýdyń bolmaýy aıaqtyń jaǵdaıy jaqsy degendi bildirmeıdi. Sondyqtan patsıentterge aıaqtaryn, sonyń ishinde tabanyn jáne bashpaılarynyń arasyn kún saıyn tekserýge keńes beriledi. Eń bastysy – máseleni erte anyqtaý, – dedi Tóleıgúl Iskakova.
Dáriger mundaı jaǵdaıǵa óz tájirıbesinen naqty mysal keltiredi. Onyń aıtýynsha, qant dıabetimen aýyratyn patsıent áıeldiń oń aıaǵynda aýyr ınfektsııa damyǵan. Onyń jaǵdaıy búırek qyzmetiniń buzylýymen, qanazdyqpen jáne tize býynynyń zaqymdanýymen asqynǵan.
Naýqasqa birneshe mamannyń qatysýymen uzaq keshendi em júrgizilip, birneshe ret operatsııa jasaýǵa týra kelgen. Nátıjesinde dárigerler tize býynyn, aıaqtyń tirek qyzmetin saqtap, jaralardyń jazylýyna qol jetkizgen.
- Bul jaǵdaı dıabettik tabandy emdeý kezinde tek jaramen ǵana shektelmeı, onyń jazylýyna kedergi keltiretin sebepterdi anyqtaý mańyzdy ekenin kórsetedi. Aıaqqa qannyń barýyn baǵalap, qandaǵy qant deńgeıin baqylaý jáne ınfektsııany ýaqytyly emdeý qajet, – dep atap ótti hırýrg.
Aıaqqa durys kútim jasaý úshin dáriger mynadaı qarapaıym erejelerdi saqtaýǵa keńes berdi:
- Aıaqty kún saıyn tekserip, jaralarǵa, kúldireýikterge, qyzarýǵa jáne isinýge nazar aýdarý.
- Aıaqty jyly, biraq ystyq emes sýmen jýý jáne bashpaılardyń arasyn muqııat qurǵatý.
- Qurǵaq terige ylǵaldandyratyn krem jaǵý, biraq ony bashpaılardyń arasyna jaqpaý.
Aıaqty qyspaıtyn, qajamaıtyn yńǵaıly aıaq kıim kııý.
- Jalańaıaq júrmeý jáne aıaqty jylytqyshpen qyzdyrmaý.
- Mozolderdi ózdiginen alyp tastamaý, tyrnaqtardy abaılap qysqartý.
- Sezimtaldyq tómendegen kezde adam tipti kúıikti de baıqamaı qalýy múmkin. Sondyqtan aıaqty ystyq sýǵa salýǵa, býlaýǵa nemese mozolderdi ózdiginen kesip alýǵa bolmaıdy, – dep eskertti maman.
Onyń sózinshe, aıaqta kez kelgen jara, oıyq jara nemese jarylǵan kúldireýik paıda bolsa, sol kúni-aq dárigerge qaralý qajet. Óz betinshe emdelýge, kúldireýikterdi tesýge nemese antıbıotıkterdi dárigerdiń taǵaıyndaýynsyz qabyldaýǵa bolmaıdy. Eger isingen aımaq tez ulǵaısa, teri qyzaryp nemese qaraıyp ketse, dene qyzýy kóterilse ne aıqyn álsizdik baıqalsa, shuǵyl medıtsınalyq kómekke júginý qajet.
Dáriger aldyn alý sharalary aıaq-qoldy saqtap qalýdyń negizgi kepili ekenin atap ótti. Patsıentter qandaǵy qant deńgeıin, arterııalyq qysymdy jáne holesterındi baqylap, dáriger taǵaıyndaǵan dárilerdi qabyldaýy jáne turaqty túrde medıtsınalyq tekserýden ótýi qajet. Shaǵymdar bolmasa da, aıaq tabanyn jylyna keminde bir ret teksertý kerek. Al buryn oıyq jara bolǵan, aıaqtyń sezimtaldyǵy tómendegen nemese qan tamyrlarynda buzylystar anyqtalǵan patsıentter jıirek tekserilýi tıis.
Eske salaıyq, Almatyda dárigerler 8-qabattan qulaǵan jasóspirimdi aman alyp qaldy.
