Qant baǵasyna qatysty qajetsiz deldaldardy anyqtaý qajet – Álıhan Smaılov

NUR-SULTAN. QazAqparat – Elimizde qanttyń qajetti qory bar. Bul týraly Úkimet otyrysynda Premer-Mınıstr Álıhan Smaıylov aıtty, dep habarlaıdy QazAqparat tilshisi.

«Azyq-túlik qaýipsizdigin qamtamasyz etý jáne naryqty otandyq ónimdermen tolyqtyrý – bizdiń strategııalyq mindetimiz. Qalyptasqan jaǵdaı keıbir taýar pozıtsııalary boıynsha, ásirese, qant naryǵynda problemalardyń bar ekenin kórsetti. Biz qant tapshylyǵy men onyń qymbattaýyna qatysty halyqtyń narazylyǵyn kórip otyrmyz. Bul jóninde Memleket basshysy tarapynan da ádil syn aıtyldy. Osyǵan baılanysty, atalǵan salany damytý boıynsha Keshendi jospar ázirlendi. Bizdiń aldymyzda birinshi kezekte, qant zaýyttaryn otandyq shıkizatpen qamtamasyz etý mindeti tur», - dedi Á. Smaılov.

Osy oraıda Úkimet basshysy egis alqaptaryn 11,5 myńnan 38 myń gektarǵa deıin, ıaǵnı 3 esege arttyrý josparlanyp otyrǵanyn aıtty.

«Bul aldaǵy 5 jylda otandyq shıkizattan qant óndirý kólemin jyl saıyn 250 myń tonnaǵa deıin jetkizýge múmkindik beredi. Buǵan qosa, qant zaýyttaryn barynsha jańǵyrtý jáne olardyń óndiristik qýatyn arttyrý qajet. Jalpy, qantpen qamtamasyz etý jaǵdaıy turaqtaldy. Qanttyń qajetti qory bar. Óńirlerde dúrligýge jol bermeý qajet. Sondyqtan, qant baǵasyna qatysty túrli manıpýlıatsııalardyń aldyn alyp, alypsatarlyq áreketter men qajetsiz deldaldardy anyqtaý qajet», - dedi Premer-Mınıstr.

«Aýyl sharýashylyǵy mınıstrligi Saýda mınıstrligimen jáne óńir ákimdikterimen birlesip, Keshendi jospardy tolyq kólemde oryndaýy tıis», - dep tapsyrdy Á. Smaılov.

Budan buryn habarlanǵandaı, QR Aýyl sharýashylyǵy vıtse-mınıstri Ábilqaıyr Tamabek Qazaqstandaǵy qanttyń 58% shetelden jetkiziletinin aıtty.