«Qansonar – 2022»: Qaraǵandy oblysynda tazylar jarysy uıymdastyryldy
QARAǴANDY. QazAqparat – Qaraǵandy oblysy, Aqtoǵaı aýdanynyń Shashýbaı kentinde tazylar jarysy ótti.
Jarysqa Qazaqstannyń barlyq aımaqtarynan 50-den astam ıt ósirýshiler qatysty. Olar tórt aıaqty dostarynyń qasıetterin kórsetip qana qoımaı, arnaıy uıymdastyrylǵan kórmede tazy tuqymynyń barlyq artyqshylyqtaryn kópshilik nazaryna usyndy, dep habarlaıdy QazAqparat tilshisi.
«Qansonar-2022» uıymdastyrýshysy – Aqtoǵaı aýdanynyń turǵyny Qurmash Nurpeıisov. Ol naǵyz qazaqı ańshy ıtterdiń jankúıeri jáne tájirıbesý mol ańshy.
«Men aýdannyń qarapaıym turǵynymyn, «Aqtoǵaı Energo» kásipornynda ýchaske bastyǵy bolyp jumys isteımin. Men tazylardy, ań aýlaýdy jaqsy kóremin. Meniń jeti tazym bar. Jubaıym men balalarym da meniń ıtterge degen súıispenshiligimdi biledi jáne qoldaıdy, olardy asyraýǵa kómektesedi. Tazy – otbasymyzdyń múshesi ispettes. Mundaı aýqymdy jarystardy men birinshi ret uıymdastyryp otyrǵan joqpyn. Men sondaı-aq osy jarystardyń demeýshisi de bolamyn. Keremet baı emespin, biraq bul sharalarǵa qoldaý kerek dep sanaımyn. Sebebi, tazy – halyq qazynasy, bizdiń maqtanyshymyz. Bıyl biz 5 km qashyqtyqqa júgirýdi uıymdastyrdyq. Buryn 2 jáne 3 km júgirister bolǵan, al búginde biz qazaqı tazylardyń 5 shaqyrymdy da ońaı baǵyndyra alatynyn dáleldedik», - deıdi Qurmash Nurpeıisov.
Tazynyń júgirisinen basqa, ıtter kórmesi jáne búrkitpen ań aýlaý sharalary uıymdastyryldy. Jarysty qarashaı jylqylaryn tizgindegen shabandozdar ashty.
«Bul búkil Shashýbaı úshin orasan zor is-shara boldy. Barlyǵy kómektesti. Bizdiń áıelder ulttyq jeıdelerde qonaqtardy qarsy alyp, tamaqtandyrdy. 5 km júgirýde birinshi bolyp jeti tazy keldi. Birinshi oryndy Balqashtan kelgen, ekinshi oryndy Qostanaıdan, úshinshi oryndy Kókshetaýdan, tórtinshi oryndy bizdiń oblystan, besinshi jáne altynshy oryndy Almatydan ákelgen tazylar, jáne jetinshi oryndy da bizdiń óńirimizdiń qazyqı ıti ıelendi. Jeńimpazdar qarashaı jylqysymen jáne iri qara malmen marapattaldy. Birinshi oryn alǵan tazynyń ıesine men qarashaı tuqymdy jylqymdy, qalǵandaryna múıizdi iri qara syıladym. Jetinshi oryn úshin eshki berildi», –deıdi jarys uıymdastyrýshysy.
«Qansonar-2022» qatysýshylary da nazardan tys qalǵan joq. Olardyń barlyǵy alǵys hattarmen jáne gramotalarmen marapattaldy. Almatydan kelgen búrkitshiler aqshalaı syılyqtarmen marapattaldy.
«Shashýbaıda osyndaı aýqymdy is-sharanyń uıymdastyrylǵanyna óte qýanyshtymyn. Men Tarazdan keldim. Qazir jasym 80-de. Biraq balalar osynda kelýdi usynǵanda, men birden kelistim. 7 jasymnan bastap tazyǵa, 15 jasymnan kókparǵa qatysyp, kúrespen aınalysqanmyn. Munyń bári bizdiń baılyǵymyz, dástúrimiz. Qazaqstanda osyndaı is-sharalardy jandandyryp, ulttyq rýhty kóterý kerek», – dep sanaıdy jarystyń eń qart qatysýshylarynyń biri Sátmaqan Joltaev.
