«Qansonar-2018»: Qazaqstandaǵy eń alǵyr qyran anyqtaldy

Qyran qustardyń baǵy men baby synǵa túsken jarysqa elimizdiń 10 oblysynan 39 búrkitshi qatysty. Jartylaı fınalǵa 13 búrkitshi shyǵyp, fınalda tórteýi ózara baq synasty.

Chempıonattyń erejelerine sáıkes qusbegilerge birneshe talaptar qoıyldy. Aldymen saıysqa qatysýshylardyń kıgen kıimi, qural-jabdyqtary men qustarynyń baby synalyp, tóreshiler tarapynan sáıkes upaılaryn aldy.

Búgin qatysýshylar qoıan, túlki aýlaý boıynsha synǵa tústi. Jarystyń kórigi qoıanǵa qus salǵanda qyza tústi. Tórt qyran da bul synnan súrinbeı ótti. Osydan soń tóreshilerdiń sheshimimen «qolǵa shaqyrýdan» qaıta saıys uıymdastyrylyp, jeńimpazdar anyqtaldy.
  

Saıys qorytyndysynda búrkit­shilerdiń úzdik tórttigi anyq­ta­lyp, barshasy da qomaqty qarjy­laı syılyqtarǵa ıe boldy.

Ońtústik Qazaqstannan kelgen Nurǵalı Alıqulovtyń búrkiti birinshi orynǵa ıe bolyp, 250 myń teńgeniń sertıfıkaty berildi.


Shyǵys Qazaqstan oblysy Úrjar aýdanynyń qusbegisi Nuǵym Qaıdar ekinshi oryn ıegeri atanyp, 150 myń teńge ojalady. Almaty oblysynan Eltaı Mýftekeev qola júldeni qanjyǵasyna baılap, 100 myń teńgeni utyp aldy.

 

Tórtinshi orynǵa shyǵysqazaqstandyq Táttimbet Kápuly taban tiredi.

Jarystyń sońynda sóz alǵan Úrjar aýdanynyń ákimi Serik Zaınýldın búr­kit­shiler basqosýynyń elordamyz Astana qalasynyń 20 jyldyq mereıtoıyna arnalǵanyn atap ótti. Sondaı-aq, Elbasy Nursultan Nazarbaevtyń jáne «Nur Otan» partııasynyń qol­daýy­men elimizde ulttyq sport túr­leri keńinen damyp kele jat­qan­dyǵyn aıtty.
  

«Shyǵystyń shyraıly jerinde Úrjar aýdanynda qusbegilerdiń chempıonaty óte joǵarǵy deńgeıde ótti. Úrjar aýdany basshylyǵyna, demeýshilik kórsetken azamattarǵa alǵysymyz zor. Qyryqqa jýyq qusbegi baq synasty. Elimizde búrkitshiler sany jyl saıyn kóbeıip keledi. Bul degenimiz elimizde atadan mura bolǵan qusbegilik ónerdiń keń qanat jaıǵanyna aıqyn dálel», - dedi QR Sport jáne deneshynyqtyrý isteri komıtetine qarasty Ulttyq sport basqarmasynyń saıatshylyqtan bas jattyqtyrýshysy Bazarbek Kúntýǵanuly.

                                                                                                                                                                  Zýhra Nurjanqyzy