«Qansonar 2017»: Arman Qoshqarovtyń búrkiti birinshi oryndy jeńip aldy

Atyraý oblysynda araǵa toǵyz jyl ýaqyt salyp ekinshi márte ótkizilip otyrǵan týrnırge Atyraý, Jambyl, Aqtóbe, Qyzylorda oblysynan, jáne Kókshetaý, Pavlodar, Almaty, Astana qalalarynan jıyrma búkitshi, tórt qarshyǵa qatysty, dep jazady dodasport.kz.

Búrkitshiler arasyndaǵy saıys týrnırdiń ekinshi kúni qyza tústi. Saıatshylar búrkitterin qoıan, qarsaq, qasqyrǵa salyp jarysqa túsirse, qarshyǵalar qoıan, kepter aýlaýmen baǵyn synady. Aqtyń kezeńge atyraýlyq Arman Qoshqarovtyń «Naryn» atty búrkiti men Aqmola oblysynan kelgen Bergenbaı Tastanbekulynyń búrkiti ótip, qasqyr aýlaýdan synǵa túsken bolatyn. Bul synda qos búrkit te ıesin jerge qaratpady. Alaıda, tóreshilerdiń saraptaýy nátıjesinde aldyńǵy kezeńderde jınaǵan joǵary upaıymen atyraýlyq Arman Qoshqarovtyń «Naryn» atty búrkiti birinshi oryndy, aqmolalyq Bergenbaı Aqtambekulynyń búrkiti ekinshi oryndyenshiledi. Al, Astana qalasynan kelgen Rýslan Maǵzomov úshinshi oryndy qanaǵat tutty.

Sondaı-aq, qarshyǵashylardyń týrnırinde Jambyl oblysynan kelgen 15 jasar Serikbolsyn Jalǵasuly qarshyǵa salýdan «Eń jas saıatshy» atalymyna ıe boldy. Bul saıysta atyraýlyq Aqberen Qurmanǵalıev úshinshi oryndy, Almaty oblysynyń qarshyǵashysy Aıat Seıitjan ekinshi oryn jeńip aldy. Qarshyǵasy barlyq kezeńderden joǵary upaımen ótken Jambyl oblysynyń týmasy Baýyrjan Shernııazǵa birinshi oryn buıyrdy. Qarshyǵashylarǵa alǵan júldelerine qaraı ulttyq sport túrleri atyraý oblystyq klýby atynan 50 myń, 30 myń, 20 myń teńge kóleminde syıaqy tabys etildi.  Al, búrkitshiler 250 myń, 150 myń jáne 100 myń teńgeniń sertıfıkatyna ıe boldy.

- Respýblıkalyq týrnır oıdaǵydaı ótti. Eki aıdan astam ýaqyt daıyndaldyq. Búrkitshiler saıysyn aldaǵy ýaqytta da ótkizýge bolady. Oǵan Atyraýdyń jerinde eshqandaı qolaısyzdyq joq, - deıdi Atyraý oblysynyń ulttyq sport túrleri klýbynyń bas bapkeri Ábdikárim Qoshqarov.