Qansyrap jatyp qońyraý shalǵan balaǵa senbegen «112» qyzmetkeriniń soty ótip jatyr
Aqtóbe qalalyq sotynda Qylmystyq kodekstiń «Salǵyrttyq» babymen Tótenshe jaǵdaılar departamentiniń qyzmetkerine qatysty is qaralyp jatyr, dep habarlaıdy Kazinform.
Buǵan deıin jazǵanymyzdaı, bıylǵy naýryz aıynda er adam urlyq jasaý maqsatynda ashyq turǵan balkon arqyly páterge kirip, otbasynyń úsh múshesin pyshaqtap óltirdi. Tek bir bala aman qaldy. Endi osy is boıynsha taǵy bir qylmystyq is qaralyp jatyr. Bul - TJD qyzmetkeriniń isi. «112» mamany qansyrap jatyp qońyraý shalǵan balanyń sózine senbegen.
«2023 jyldyń 29 naýryzy kúni kámelet jasqa tolmaǵan jábirlenýshi pyshaq jaraqatyn alǵan soń qutqarý qyzmetine birneshe ret qońyraý shalǵan. Al oblystyq TJD-niń qyzmetkeri qońyraýǵa durys jaýap bermedi, kómek kórsetýge asyqpady. Tek úshinshi ret habarlasqanda ǵana jedel járdem jibergen. Ol óz qyzmetin durys atqarmaǵan. Qylmystyq kodekstiń 371-baby 1-bóligimen sotqa aryz tústi. Kinásin moıyndamaýda. Kámelet jasqa tolmaǵan bala sol kúni saǵat 3:35-ten 4:25-ke deıin habarlasqan. Al qyzmetker muny balanyń oıyny dep oılaǵan», – dedi Aqtóbe oblysy prokýrorynyń aǵa kómekshisi Ásel Tanalıeva.
Jábirlenýshi tarap kinálige zań aıasynda qatań jaza berýdi surap otyr.
«Qutqarý qyzmeti bala ázildep tur dep oılap, senbegen. Ol qaıta-qaıta habarlasqanynyń arqasynda tiri qaldy. Ol úsh ret telefon shalǵan. Úshinshi ret habarlasqanda ǵana kómek keldi. Qutqarý qyzmeti isine salǵyrt qaraǵany úshin qatań jaýapqa tartylýy kerek dep esepteımin. Ony sot sheshedi. Biz 5 mln teńge moraldyq shyǵyn surap otyrmyz», – dedi aman qalǵan oqýshynyń apasy Evgenııa Kaırıs.
