Qanshama aýyl múshkil halge jetip, jabylyp qaldy — depýtat

ASTANA. KAZINFORM — Májilis depýtaty Rınat Zaıytov elimizde aýyldardyń azyp-tozyp, jabylyp jatqanyna alańdaýshylyq tanytty.

— Qajetti ınfraqurylymnyń sapaly medıtsına men bilimniń, turaqty jumys pen tabystyń, tipti qarapaıym ınternettiń joqtyǵynan 34 jyldyń ishinde týǵan aýylyn amalsyzdyqtan az adam tastaǵan joq. Sonyń saldarynan, qanshama aýylymyz «mújilgen súıekteı» múshkil halge jetip, jabylyp qaldy. Sońǵy 5 jylda ShQO-da 350 aýyl, SQO-da 635, Pavlodar oblysy boıynsha 352 aýyl bos qaldy. 2024 jyldyń ózinde-aq SQO-da 141 aýyl mártebesinen aıyrylǵan. Bul — jaı ǵana aýyldardyń sandary emes, myńdaǵan otbasynyń týǵan jeri, ushqan uıasy, ómiriniń tarıhy ǵoı. Aýyl degen jaı jaba salatyn esik emes, qazaqtyń altyn besigi ekenin nege umyttyq, — dedi Rınat Zaıytov Májilistiń jalpy otyrysynan keıin Úkimet basshysynyń atyna depýtattyq saýal joldaı otyryp.

Halyq qalaýlysynyń aıtýynsha, bir — eki baǵdarlama Qazaqstannyń barlyq aýylyn gúldendirip jibere almaıdy.

— Keshe Memleket basshysy Úkimettiń keńeıtilgen otyrysyndaǵy óziniń qorytyndy sózinde: «Aýyldyq aımaqtardy jan-jaqty damytýǵa arnalǵan memlekettik qoldaý sharalarynyń bárin bir baǵdarlamaǵa biriktirý durys sheshim bolmaq, ıaǵnı «Aýyl amanaty», «Aýyl — el besigi» jáne taǵy basqa baǵdarlamalary týraly» atap ótti. Búginde aýyl turǵyndary óz kúnimen qandaı da bir is bastaısyń dese de kedergiler óte kóp, mal baǵyp, egin ósireıin dese, jeri, kásip bastaıyn dese, qarjysy, qajetti ınfroqurylymy da joq. Turǵyndaryn bylaı qoıyp, aýyldyń ákiminde de qarapaıym qajettilikterdi óteıtin bıýdjette tehnıka da, pármen de joq. Aýyldardy osyndaı kúıge jetkizgen soń, aýyl halqyna nege kóshtiń dep qaı betimizben aıtamyz? «Arqada aıaz bolmasa, arqar aýyp nesi bar» — degendi bárimiz biletin shyǵarmyz, — deıdi ol.

Sondaı-aq Májilis depýtaty Abaı oblysy Aıagóz aýdanynda 10-nan astam aýyldy japqaly jatqanyn aıtty. 

Osy oraıda Rınat Zaıytov aýyldardy damytý úshin kelesi usynystardy alǵa tartty: 
1. Aýyl ákimderiniń pármenin kúsheıtý;
2. Bir aýylǵa bir tehnıka, ıaǵnı aýyldardy tehnıkamen qamtý;
3. Bul máseleni ulttyq deńgeıge kóterip, Úkimet basshylyǵy jáne oblys ákimderi deńgeıinde qonys aýdarý jónindegi memlekettik komıssııa qurý;
4. Aýyldyq jerlerge jastardy turaqtandyrý jáne qonystandyrýǵa baǵyttalǵan jumys josparyn qurý, ony aýyldyq jastarǵa jetkizý.

Aıta ketsek, Memleket basshysy keshe Úkimettiń keńeıtilgen otyrysynda aýyldyq aımaqtardy damytýǵa arnalǵan qoldaýdy bir baǵdarlamaǵa biriktirý kerektigin aıtqan edi.