Qansha oqýshy mektepten kompıýter alyp úlgerdi

NUR-SULTAN. QazAqparat - Jergilikti atqarýshy organdar shamamen 200 myń kompıýter satyp alyp, oqýshylarǵa berdi. Bul týraly QR Bilim jáne ǵylym mınıstri Ashat Aımaǵambetov aıtty, dep habarlaıdy QazAqparat tilshisi.

Ortalyq kommýnıkatsııalar qyzmetindegi baspasóz máslıhatynda mınıstr kompıýter jetkizý jumystary kúndelikti júrgizilip jatqanyn basa aıtty.

«Memlekettik múlik týraly» Zańǵa jáne Azamattyq kodekske sáıkes, bul kompıýterler muqtaj otbasylarǵa ýaqytsha paıdalanýǵa beriledi. Bul mekteptiń múlki ekendigin túsiný qajet. Kompıýterler mektep úshin satyp alynyp, oqý protsesi aıasynda qoldaný úshin balalarǵa beriledi», - dedi Ashat Aımaǵambetov.

Onyń atap ótýinshe, tehnıka satyp alý úshin jergilikti atqarýshy organdar qarjy bólgen. Buǵan qosa, respýblıkalyq bıýdjetten de qosymsha qarajat jiberilip otyr. Kompıýterler eń aldymen kópbalaly jáne tabysy az otbasylardyń balalaryna beriledi.

Mınıstr oqýshylarǵa berilgen kompıýterler búlingen jaǵdaıda bul másele «Memlekettik múlik týraly» zańnyń 72 jáne 76-baptary aıasynda sheshiletindigin aıtty.

Onyń sózine qaraǵanda, ótken oqý jylynyń 4-toqsanynda balalarǵa berilgen tehnıkanyń eshqaısysy búlinbegen. Ata-analar mektep múlkine zor jaýapkershilikpen qarap otyr.