Qansha oqýshy APV-ǵa qarsy vaktsına aldy
ASTANA. KAZINFORM — Elimizde 278,2 myńnan astam profılaktıkalyq vaktsınatsııa júrgizildi, onyń ishinde birinshi dozany 170 myń jasóspirim, ekinshi dozany — 108,2 myń adam aldy. Bul týraly DSM baspasóz qyzmeti habarlady.
— 2024 jyldyń qyrkúıeginen bastap Qazaqstanda 11-13 jas aralyǵyndaǵy qyzdarǵa adam papıllomasy vırýsyna qarsy vaktsınatsııalaý bastaldy. Búgingi tańda elimizde 278,2 myńnan astam profılaktıkalyq vaktsınatsııa júrgizildi, onyń ishinde birinshi dozany 170 myń jasóspirim, ekinshi dozany — 108,2 myń adam aldy. Immýndaýdan keıin jaǵymsyz kórinis jaǵdaılary tirkelgen joq, — delingen habarlamada.
APV-ǵa qarsy vaktsınatsııalaýdy tıimdi engizý men monıtorıngti qamtamasyz etý úshin ımmýndaý barysyna turaqty baqylaý júrgiziledi.
Vaktsına qaýipsiz, jaqsy tózimdi jáne aldyn alýdyń tıimdi ádisi retinde Dúnıejúzilik densaýlyq saqtaý uıymy usynady.
APV-ǵa qarsy ımmýndaý baǵdarlamasynyń negizgi maqsaty áıelderdi APV-nyń negizgi qozdyrǵyshy bolyp tabylatyn jatyr moıny obyrynan, sondaı-aq genıtaldyń kandılomalardy, anýs jáne jynys músheleriniń obyryn qosa alǵanda, basqa da onkologııalyq aýrýlardan qorǵaý bolyp tabylady.
APV-men syrqattanýdyń aýyrtpalyǵyn jáne vaktsınatsııalaýdyń tıimdiligin eskere otyryp, 147 el bul vaktsınany ózderiniń ulttyq ımmýndaý baǵdarlamalaryna engizdi jáne álemniń 76 eli APV-ǵa qarsy áıelder men erlerdi vaktsınatsııalaıdy.
Aıta ketelik Almatyda 10 myń mektep oqýshysy APV-ǵa qarsy vaktsına aldy.