Qansha memleket Qazaqstanda mıgratsııalyq tirkeýden bosatylǵan
ASTANA. QazAqparat - Búgin Parlament Májilisindegi Úkimet saǵatynda QR Іshki ister mınıstri Qalmuhanbet Qasymov sheteldikterdiń Qazaqstanǵa saparlaý tártibin túsindirdi, dep habarlaıdy QazAqparat.
«Qazir elimizde depýtattyq korpýstyń belsendi qatysýy jáne qoldaýy arqasynda jańa mıgratsııalyq saıasat qalyptasty, bul halyqaralyq standarttarǵa saı keledi. Sheteldik jumys kúshin tartý kvota berý tetigi arqyly júzege asady. Bul mamandar qurylys salasynda, ónerkásip, aýyl sharýashylyǵy jáne basqa da salalarda jumys isteıdi. Sonymen qatar zań boıynsha naqty ınvestıtsııalyq jobalardy iske asyrý úshin sheteldik kásibı jumysshylardy kvotasyz ári ruqsatsyz tartýǵa múmkindik bar. Ár memleket azamattarynyń elimizge kelý men tirkelý rásimi ártúrli. Qazaqstanǵa kirý úshin olardyń denine vıza kerek. 19 elmen jalpyazamattyq pasporttar boıynsha kelýdiń vızasyz tártibi týraly kelisim jasaldy. Olardyń qatarynda Eýrazııalyq ekonomıkalyq odaq elderi de bar. 45 eldiń azamattary 30 kúnge deıin vıza rásiminen jáne tirkelýden bosatylǵan», - dep naqtylady mınıstr.
2016 jylǵy shildeden bastap Qytaı azamattarynyń Qazaqstan Respýblıkasyna toptasyp týrıstik saparlaryn jeńildetý týraly memorandým qoldanyla bastady. Munymen qosa, sheteldik ınvestorlar úshin jaǵdaı jasaýǵa erekshe nazar aýdarylýda. Investorlyq vıza 3 jylǵa beriledi. Investorlardan ishki ister organdarynda tirkelý talap etilmeıdi.
«Sońǵy jyldary sheteldikterdi tirkeý rásimin birshama jeńildettik. Ekonomıkalyq damyǵan jáne saıası turaqty 56 eldiń azamattary shekaradan ótken boıda keden qyzmetinde tirkele alady. Bul olardy kóshi-qon qyzmetine kelip, tirkelýden bosatady», - dep túsindirdi Qasymov.
Sonymen qatar ol Eýrazııalyq ekonomıkalyq odaq elderi men Tájikstan azamattary erekshe mártebege ıe ekenin eske salyp ótti. Olar shekaradan ótkennen bastap 30 kúnge deıin tirkelýden bosatylady. EAEO elderi azamattaryna bizdiń memleketimizde jumys isteýi úshin ruqsat kerek emes. Ótken jyldan bastap shetel azamattaryn qabyldaıtyn barlyq zańdy ári jeke tulǵalar olardy «elektrondyq úkimet» portaly arqyly tirkeýge múmkindik aldy.
