Qansha kólik ınspektory jazaǵa tartyldy
«Kúni keshe ǵana Almaty oblysy boıynsha kólikti baqylaý ınspektsııasy basshysynyń orynbasary jáne onyń birqatar baǵynyshty qyzmetkerleri júıeli túrde para aldy degen kúdikpen ustaldy. Kólik komıtetiniń basshylyǵy barlyq deńgeıdegi qyzmetkerler arasynda sybaılas jemqorlyq quqyq buzýshylyqtardyń birde-birine tózbeıdi. Kólik ınspektorlarynyń arasyndaǵy sybaılas jemqorlyqqa qarsy kúres kóptegen jyldar boıy Komıtettiń basym mindetteriniń biri bolyp keledi. Bul sala sybaılas jemqorlyq táýekeline beıim, biz muny bilemiz jáne ony barynsha joıyp kelemiz», - delingen QR IDM Kólik komıteti baspasóz qyzmeti taratqan habarlamada.
Belgili bolǵandaı, tek 2017 jyly sybaılas jemqorlyq qylmysyn jasaǵany úshin aımaqtyq organdardyń 13 laýazymdy tulǵasy tutqyndalyp, olardyń 8-i sottaldy, sonyń ishinde birneshe basshy bar.
«Byltyrdan bastap Komıtette Sybaılas jemqorlyqpen kúres jónindegi keńes jumys isteıdi. Al Komıtet jumysy sońǵy jyldary osy saladaǵy adamı faktordy azaıtýǵa baǵyttalǵan. Osylaısha, búgin kólikti baqylaý beketteriniń barlyǵy, sonyń ishinde jyljymaly beketter de beınebaqylaý kameralarymen jabdyqtaldy. 2018 jyldyń basynan beri Komıtettiń Ahýaldyq ortalyǵy kólikti baqylaý beketteriniń jumysynda 98 zań buzýshylyqty anyqtady. Nátıjesinde, tártiptik jaýapkershilikke 53 qyzmetker tartylyp, 7-i jumystan bosatyldy. Sonymen birge, beketterdiń jumysyn baqylaý úshin Birinshi sybaılas jemqorlyqqa qarsy medıa ortalyq músheleriniń qatysýymen jumys toptary qurylǵan. Olar beketterdi qupııa túrde tekseredi», - dep atap ótilgen vedomstvo málimetinde.
Byltyr jyl sońynda Sybaılas jemqorlyq táýekelderin monıtorıngileý jáne joıý basqarmasy qurylǵan bolatyn. Onyń kómegimen sybaılas jemqorlyq zań buzýshylyǵyn jasaý kúdigimen 5 fakt anyqtaldy. Memlekettik qyzmettiń bedeline nuqsan keltiretin 84 fakt taǵy bar. Kólikti baqylaý organdarynyń 39 qyzmetkeri tártiptik jaýapkershilikke tartyldy.
«Zań buzýshylyqpen kúreste eń basty shart - ınspektorlardyń aýyr júk kólikterin sebepsiz toqtatýlaryn joıý. Qyzmetkerler qazir kimdi toqtatyp, kimdi ótkizýin ózderi biledi, osy máseleni sheshý úshin Komıtet júıeli shara qoldanatyn bolady. 12 qyrkúıek kúni Parlament Májilisinde respýblıkalyq mańyzy bar joldarda kólik quraldaryn jappaı toqtatý tájirıbesinen bas tartýǵa múmkindik beretin Zań jobasy tanystyryldy. Endi ıspektorlar kólik quraldaryn dáleldi negizsiz toqtata almaıdy. Tekseris sebepteriniń tizimi Zańmen bekitiledi», - dep habarlady Komıtet ókilderi.