Qansha qazaqstandyq zeınetaqy jınaǵyn basqarýshy kompanııaǵa berdi

NUR-SULTAN. QazAqparat – Búgingi tańda 99 qazaqstandyq zeınetaqy jınaǵyndaǵy qarajatynyń bir bóligin basqarýshy kompanııaǵa aýdarý týraly ótinim berdi. Bul týraly QR Qarjy naryǵyn retteý jáne damytý agenttigi baǵaly qaǵazdar naryǵyn damytý basqarmasynyń bastyǵy Aleksandr Kamchatnyı aıtty, dep habarlaıdy QazAqparat tilshisi.

«Búgingi tańda agenttik tarapynan ruqsat berilgen 6 kompanııanyń úsheýi zeınetaqy jınaqtaryn basqarý boıynsha Biryńǵaı jınaqtaýshy zeınetaqy qorymen shart jasasty. Olar - Jysan Invest, Halyk Global Markets, BCC INVEST. BJZQ aqparatyna sáıkes, 2021 jyldyń 24 aqpanynda BJZQ-ǵa zeınetaqy jınaqtaryn zeınetaqy portfelin basqarýshyǵa aýdarýǵa 99 ótinish kelip tústi. Aýdarylatyn qarajattyń jalpy somasy 257 mln teńgeden asady», - dedi Aleksandr Kamchatnyı Ortalyq kommýnıkatsııalar qyzmetindegi baspasóz máslıhaty barysynda.

Onyń atap ótýinshe, salymshy zeınetaqy aktıvterin basqarýǵa jiberetin ınvestıtsııalyq portfeldi basqarýshylar tizbesimen, olardyń ınvestıtsııalyq deklaratsııalarymen, ınvestıtsııalyq portfelderiniń qurylymymen BJZQ saıtynynan tanysa alady.

«Sodan keıin onyń ınvestıtsııalyq basymdyqtaryna barynsha sáıkes keletin bir nemese birneshe basqarýshy kompanııany tańdaı alady», - dedi ol.