Kann kınofestıvali koronavırýsqa baılanysty keıinge qaldyryldy
KANN. QazAqparat – Frantsııada mamyrda ótetin álemdegi eń bedeldi kınofestıval keıinge qaldyryldy. Bul týraly QazAqparat The Guardian basylymyna silteme jasap habarlaıdy.
Festıval maýsymnyń sońyna aýystyryldy. Uıymdastyrýshylar tolyq sheshimdi Frantsııadaǵy jáne álemdegi densaýlyq saqtaý jaǵdaıy turaqtalǵannan keıin habarlaýǵa ýáde etti.
Bul qadam koronavırýs indetine qarsy kúresip jatqan úkimet sharalarynyń kúsheıýine baılanysty qabyldanyp otyr. Sebebi, juma kúni 100 adamnan asatyn sharalarǵa tyıym salyndy. Seısenbi kúni Frantsııa Shengen aımaǵyna kirýge tyıym salýdyń jalpy eýropalyq júıesine qosyldy.
Eske salaıyq, birneshe kún buryn Nıderlandtyń Rotterdam qalasynda ótýi tıis bolǵan «Eýrovıdenıe» jyl saıynǵy halyqaralyq konkýrs toqtatylǵanyn habarlaǵan edik.
Uıymdastyrý komıteti baıqaýdy 2021 jyly Rotterdamda ótkizý múmkindigin qarastyryp jatyr.
