Kann kınofestıvali: «Arýaq» fılmi ıtalııalyq kınoprodıýserdiń nazaryna ilikti
Fılmdi QR Mádenıet jáne sport mınıstrliginiń tapsyrysy boıynsha Sh.Aımanov atyndaǵy «Qazaqfılm» kınostýdııasy túsirgen. Kınotýyndy Qazaqstannyń ulttyq pavılonynda tanystyrylyp, halyqaralyq kınofestıvalderdiń irikteýshileri men dıstrıbýtorlarynyń qyzyǵýshylyǵyn týdyrdy.
«Men pavılonǵa qoıylǵan qazaqstandyq kınotýyndylardan erekshe áser aldym. Ásirese, qarııa men jetim bala týraly baıandaıtyn «Arýaq» fılmin atap ótkim keledi. Qazir biz qazaq áriptesterimizben atalmysh fılmniń Italııadaǵy dıstrıbýttsııasy jóninde kelissózder júrgizip jatyrmyz, - dedi ıtalııalyq kınoprodıýser Flavıo Donını.
Rejısser Qýat Ahmetovtyń «Arýaq» fılmi taǵdyrdyń jazýmen ushyrasqan qart Aǵataı men jetim bala týraly baıandaıdy.
«Ideıa avtory Asanáli Áshimov. Ol 2014 jyly maǵan elden shalǵaı turatyn jalǵyz basty qart týraly fılm túsirýdi usyndy. Asanáli aǵanyń oıy boıynsha qarııa - dala fılosofy, túrli ǵylymǵa qyzyǵatyn adam, - dedi fılmniń rejısseri Qýat Ahmetov.
Fılm byltyr óndiriske jiberilip, bıyl kóktemde aıaqtalǵan. Túsirilim jumystary Almaty oblysyndaǵy Іle ózeni jaǵalaýynda ótken. Fılmniń stsenarııin túrki elderiniń ertegileri men ańyz-áńgimeleri jelisi boıynsha Qýat Ahmetov pen Odılsha Agıshev jazyp shyqqan.
