Kann kınofestıvali ereýilge baılanysty ótpeı qalýy múmkin

ASTANA. KAZINFORM — Kann kınofestıvaline frantsýz úkimetiniń maýsymdyq kınofestıval qyzmetkerlerine degen kózqarasyn ózgertýdi talap etken kınomehanıkter, zal menedjerleri jáne baspasóz agentteriniń ereýiline baılanysty qaýip tónip tur. Festıval kelesi aptada ashylýy tıis, dep habarlaıdy The Guardian. 

Bıyl 200-den astam jumysshydan turatyn Sous les Écrans la Dèche (Shymyldyq artyndaǵy kedeılik) ujymy jumyssyzdyq týraly jańa zańǵa qarsy ereýilge shyqty.

Narazylyq bildirýshiler arasynda kınomehanıkter, baǵdarlamashylar, kassa qyzmetkerleri, logıstıka menedjerleri, zal menedjerleri, júrgizýshiler, dekoratsııa jasaýshylar men press-attashe bar.

Bul qyzmetkerler jumysqa qysqa merzimdi kelisim-shart boıynsha alynady.

Narazylyq bildirýshilerdiń pikirinshe, jańa erejelerge sáıkes, olar Frantsııanyń shtattan tys oryndaýshylar, ártister men mádenıet salasyndaǵy tehnıkter úshin jumyssyzdyqtan saqtandyrý júıesimen qamtylmaıdy, bul — jumyssyzdyq kezeńinde memlekettik qoldaý kórsetý kezinde jalaqyny eń tómengi deńgeıge deıin kóteretin júıe. 

Osylaısha, adamdar jumyssyzdyq kezeńinde memlekettik qoldaýdan aıyrylyp, járdemaqy ala almaı, basqa tabys kózin izdeýge májbúr bolady.

Narazylyq bildirýshilerdiń aıtýynsha, zań kúshine ense, festıvalderde jumys isteıtin eshkim qalmaıdy.

Jańa erejeler osy jyldyń shilde aıynda kúshine enedi. 

Frantsııanyń Kókshil jaǵalaýyndaǵy festıval 1968 jyly mamyrynda stýdentter men jumysshylardyń narazylyqtary kezinde bir ret qana úlken ereýilge tap boldy.