Kann festıvaliniń bas júldesin Mıhael Hanekeniń «Mahabbat» fılmi jeńip aldy
ASTANA. 28 mamyr. QazAqparat - Kann festıvaliniń «Palma butaǵy» «Mahabbat» kınotýyndysyn túsirgen avstrııalyq rejısser Mıhael Hanekege buıyrdy, dep habarlaıdy reseılik «Jańalyqtar» agenttigi.
Festıvaldiń Gran-prı júldesin ıtalııalyq rejısser Matteo Garrone óziniń «Realıtı-shoý» atty fılmi úshin jeńip aldy. Eń úzdik stsenarıı Rýmynııa eliniń ókili Krıstıan Mýndjýdyń «Belesterdiń artynda» kınosyna berildi. «Túnekten soń jaryq» fılmin túsirgen meksıkalyq Karlos Reıgadas eń úzdik rejısser atandy. Tomas Vınterbergtiń «Ańshylyq» kınosynda oınaǵan Meds Mıkkelsen «eń úzdik erler róli» atalymynyń jeńimpazy dep tanyldy. Al eń úzdik áıel rólderinde «Belesterdiń artynda» fılminiń aktrısalary Krıstına Flıýtýr men Kosmına Stratannyń ónerleri elendi.
Kınofestıvaldiń qazylar syılyǵyn brıtandyq Ken Loých óziniń «Perishteler úlesi» týyndysy úshin aldy.
Eń úzdik debıýt amerıkalyq rejısser Ben Zaıtlınniń «Jabaıy ońtústiktiń taǵylary» atty kartınasy dep tanyldy.
