Kann festıvaline qatysqan rejısser Aqtóbeden kınostýdııa ashýdy josparlap júr
AQTÓBE. QazAqparat - Aqtóbelik rejısser Marat Teleýov qysqa metrajdy «Volshebnık» fılmimen Kann festıvaline qatysty. Rejısser endi kınostýdııa ashýdy josparlap júr, dep habarlaıdy QazAqparat tilshisi.
Rejısser Marat Teleýov Kann festıvaline qatysý týraly armanyna qol jetkizdi. Ári ınvestor izdep júr. Eki jumysty bir atqarǵan rejısser bir jyldyq eńbegin úlken festıval kezinde kórsetti. 2016 jyldyń naýryz aıynda qysqametrajdy fılm tolyq daıyn bolyp, sáýir aıynda Kann festıvaline joldandy. Kann festıvalinde júldeli orynǵa ıe bola almaǵan rejısser 2018 jylǵa qaıta shaqyrtý aldy. Biraq ázirge kıno túsirilgen joq, rejısser bıyl festıvalge qatysa almaıdy.
«Aldaǵy jyldary Kann festıvaline taǵy qatysamyn. Bizde tájirıbe bar, múmkindikterge jol ashyldy. Negizinen «Volbshebnık» fılmin túsingen operatorlar, kompozıtor tegin jumys istedi. Áýenin kompızıtor Asqar Shafı arnaıy jazdy. «AıÝ SINEMA» kınostýdııasy óz qural-jabdyǵyn berdi. Al kınoǵa túsken akterlardyń 80 paıyzy aqtóbelik jigitter. Bári sátti aıaqtaldy. Júldeger bolamyz degen úmit bolǵany ras. Jeńiske qol jetkize almadyq. Biraq Qazaqstan atynan baryp, elimiz týraly aıtyp, tanytýǵa múmkindik boldy»,- dedi rejısser Marat Teleýov.
Batys kórermenin jan-jaqty zerttegen rejısser drama túsirýdi josparlap júr. Ol aldaǵy ýaqytta 2500 jyldy postapokalıpsıs janrynda túsirmek. Biraq ázirge qarjy joq, ınvestorlardan qoldaý bolmady.
«Investorlardan qoldaý kútemiz. Mádenıet ınvestıtsııasyz damı almaıdy. Al Kann festıvaline qatysqan soń Aqtóbe oblystyq mádenıet basqarmasynan habarlasty. Men óz usynysymdy aıta keldim. Aqtóbeden kınostýdııa ashýdy josparlap júrmiz. Qoldaý bolmasa men turǵylyqty jerimdi aýystyryp, Aqtóbeden Almatyǵa birjola kóshemin. Biraq Aqtóbede qalǵym keledi»,- dedi Marat Teleýov.
Aıta keteıik, «Volshebnık» fılminde aqshadan mańyzdy zattar bar ekeni kórsetilgen.
Ideıanyń negizgi avtory aqtóbelik akter Azamat Aınaqulov. Al stsenarııdi Marat Teleýov jazdy. Kınony Almatyda túsirip, sol jaqta montajdaǵan rejısser keler jyly taǵy festıvalǵa barýdy josparlap otyr.
