Kann festıvalinde júlde alǵan Samal Eslıamova jaıynda ne bilemiz
ASTANA. QazAqparat - Qazaqstandyq aktrısa Samal Eslıamova 71-shi Kann festıvalinde úzdik áıel rólin jeńip aldy.
Osyǵan oraı QazAqparat tilshisi aktrısa jaıyndaǵy málimetterdi izdestirdi.
Internettegi ashyq málimetterge sáıkes, Samal 1984 jyldyń 1 qyrkúıeginde Petropavl qalasynda dúnıege kelgen. Reseıdiń teatr óneri ınstıtýtynyń akterlik fakýltetin bitirgen ol buǵan deıin Qazaqstan, Germanııa, Reseı jáne Shveıtsarııa birlesip túsirgen «Tıýlpan» fılminde basty róldi somdaǵan. Bul týyndy 2008 jyly Kannda «Erekshe kózqaras» konkýrsynyń bas júldesin, jas ádilqazylardyń júldesin, Frantsııanyń bilim mınıstrliginiń júldesin jeńip alǵan edi.
Al Kann festıvaliniń úzdik aktrısasy atanýyna jol ashqan «Aıka» fılmin Qazaqstan týmasy reseılik rejısser Sergeı Dvortsevoı túsirgen. Bul da Qazaqstan, Germanııa, Qytaı, Polsha jáne Reseı birigip túsirgen týyndy. «Aıka» ataýy onyń basty keıipkeriniń esimimen baılanysty qoıylǵan áleýmettik drama. Týyndy Qyrǵyzstannan Máskeýge zańsyz kelip, turyp jatqan mıgrant qyzdyń ómirin sýretteıdi.
Festıval laýreattaryn marapattaý rásiminen soń BAQ ókilderiniń túsirilim júrip jatqanda týyndy Sizdi marapatqa jetkizedi degen oı boldy ma degen saýalyna jaýap bergen Samal Eslıamova: «Kartına túsirilip jatqanda onyń rejısserdiń oılaǵanyndaı bolýy nemese bizdiń kóńilimizden shyǵýy mańyzdy, árıne. Bul bizdiń basty maqsatamyz bolatyn, jáne osy maqsat bizdi aldyǵa jetelep otyrdy»,- dep jaýap berdi ol.
