Kann festıvalinde Qazaq ulttyq pavılony ashyldy
ASTANA. QazAqparat - 71-halyqaralyq Kann festıvalinde Qazaqstannyń ulttyq pavılony shymyldyǵyn túrdi. Munda elimizdiń úzdik kınotýyndylary «Rýhanı jańǵyrý» baǵdarlamasy aıasynda tanystyrylýda, dep habarlaıdy QazAqparat 24.kz saıtyna silteme jasap.
Atalmysh is-sharalardyń barlyǵy Qazaq óner ýnıversıteti men Astananyń 20 jyldyǵyna arnalyp otyr. Qazaqstan delegatsııasynyń quramynda Mádenıet jáne sport mınıstrligi men zııaly qaýym ókilderi, qazaq kıno óneriniń kórnekti qaıratkerleri men Qazaq ulttyq óner ýnıversıtetiniń stýdentteri bar. Kann kınofestıvalinde Qazaqstan ekinshi jyl qatarynan ulttyq pavılonyn qurdy. Bul jolǵy baıqaýǵa jas daryndarymyzdyń týyndylaryn ákelgen. Olardyń arasynda «Erekshe kózqaras» baǵdarlamasyna qatysatyn rejısser Ádilhan Erjanovtyń «Laskovoe bezrazlıchıe mıra» kartınasy men Sınefondason («Cinefondation» ) baǵdarlamasyna qatysatyn Janat Alshanovanyń «Maýsym sońy» fılmi bar.
Eske salsaq, «Erekshe kózqaras» baǵdarlamasy boıynsha qazaq kınosy birneshe ret bas júldeni ıelengen edi. 1998 jyly Dárejan Ómirbaevtyń «Kıller» fılmi men 2008 jyly Sergeı Dvortsevoıdyń «Tıýlpan» kınosy úzdik shyqqan. Sondaı-aq táýelsiz kıno qaýymdastyǵynyń baǵdarlamasynda Olga Korotkonyń «Tak sebe zıma» atty tyrnaqaldy kınotýyndysymen qatar «Short film corner» baǵdarlamasynda kórsetiletin birneshe qysqametrajdy kıno da bar.
«Ulttyq pavılonnyń ashylýyna kelgen kórshi elderdiń ókilderi men dos-jarandar qazaqstandyq kınonyń qaryshtap damyp kele jatqanyn aıtty. Biz osy Frantsııada ótip jatqan festıvalmen qatar azııalyq kınolar festıvali jáne Nıý-Iorkke shaqyrtý aldyq. Biraq, árıne, qazaqstandyq kınoóndirisin qalaı nasıhattaýǵa bolatynyn baıqaımyz, al jarnama retinde Aqan Sataev pen ózge de rejısserlerdiń kınolarynan treıler, ıaǵnı úzindilerin alyp keldik, sonyń ishinde bıylǵy jyly «Eýrazııa» kınofestıvaline qatysatyn Ámire Qashaýbaev týraly kıno da bar»,-deıdi «Eýrazııa» halyqaralyq kınofestıvaliniń prezıdenti Aıman Musaqojaeva.
«Men keıipkerimniń qarapaıymdylyǵy men shynaılyǵyn, onyń ańqaýlyǵyn kórsetkim keldi. Óıtkeni kınony kórseńiz, onyń mańyndaǵy ózge keıipkerlerdiń barlyǵy ekstravertter, óte jarqyn, áserli beıneler. Al Ámireniń obrazy - shynaıy, taza, óz áleminde ómir súretin, erekshe talant ıesi. Bıyl Kann festıvalinde bizdiń elden 60-qa jýyq kınotýyndy qatysady. Bul bizdiń kıno salasynda úzdikterdiń biri ekenimizdiń dáleli. Álemniń túkpir-túkpirinen jınalǵan prodıýserler bizdiń pavılonǵa kelip qazaqstandyq mamandarmen tanysyp, áriptestik baılanys ornatýǵa nıet bildirip júr. Bul otandyq kınonyń jetistigi ári bolashaǵynyń zor ekenin kórsetedi»,-degen oıymen bólisti»,- «Ámire» fılminde basty róldi somdaýshy akter
Sanjar Mádıev.
Amerıkalyq kınoprodıýser Valter Krohmal: «Maǵan Qazaqstan úkimetiniń kınematografııa salasyna aqylǵa qonymdy ınvestıtsııa salatyny qatty áser etti. Kıno bar jerde tarıh pen tarıhı tulǵalar umtylmaıdy. Búgin qazaq maqtan tutatyn eliniń baı mádenıetin kórdik. Bul - qazaqstandyq kınonyń biregeıligin pash etip turǵan faktor. Men Qazaqstanmen etene tanysqym keledi. Sondyqtan Sizderdiń týyndylaryńyz úshin Nıý-Iorktegi alańymyzdyń esigi aıqara ashyq»,-dedıi.
Italııalyq kınoprodıýseri Flavıo Donınıdiń aıtýynsha, Qazaqstan - múmkindigi mol, ádemi, ǵajaıyp el.
«Biz Qazaqstan týraly kıno túsirgimiz keledi. Sol úshin qazaqstandyq kınoındýstrııadan ózimizge teń prodıýser izdep jatyrmyz. Biz sondaı talantty adamdy ózimizdiń ıtalııalyq pavılonda kútemiz. Kann festıvalindegi Qazaqstan ulttyq pavılonynyń alǵashqy nátıjeleri de belgili boldy. Byltyr dál osynda rejısser Erlan Nurmuhambetovtyń «Konokrady» kınokartınasy tyń serpilis ákelgen bolatyn»,-deıdi.
