Kann festıvali jeńimpazynyń ápkesi: Samal bul syılyqqa laıyqty
PETROPAVL. QazAqparat - Búgin tańerteńmen Samal Eslıamovanyń týystaryna jan-jaqtan quttyqtaýlar kelip jatyr, dep habarlaıdy QazAqparat tilshisi.
Eslıamovtar otbasynda telefonǵa tynym bolmaı jatyr. Aktrısanyń anasy Gúlmaıra apaı men ákesi Іlııas aǵaı quttyqtaýlardan tolqyp, tipti kózine jas aldy. 
Aktrısa Soltústik Qazaqstan oblysynyń Aqqaıyń aýdanyndaǵy Aralaǵash aýylynda týǵan. Jýrnalıst bolýdy armandaıtyn ony taǵdyr basqa arnamen alyp ketti. Sol jyly óner kolledjiniń «qazaq teatrynyń akteri» kýrsyna stýdentter qabyldana bastaǵan. Samal oǵan alǵashqylardyń qatarynda tústi. Biraq dıplomyn onyń ornyna ápkesi Aıagóz aldy. Óıtkeni jas daryn ıesi ol kezde Sergeı Dvortsevoıdyń «Qyzǵaldaq» («Tıýlpan») atty kartınasyna túsýge attanyp ketken bolatyn. 
«Ol únemi shıraq júretin, ári qatal, ári meıirimdi boldy. Kastıngte odan qandaı róldi somdaǵyń keledi dep suraǵandarǵa: «Eń basty róldi!» dep jaýap beredi. Birneshe kúnnen keıin ony Almatyǵa shaqyryp, rólge bekitti. Keıin Samal Reseı teatr óneri akademııasyna oqýǵa qabyldandy. Kóp uzamaı Sergeı Dvortsevoı ony «Aıka» fılminde ról somdaýǵa shaqyrdy. Fılmniń túsirilimi uzaqqa sozyldy. Bilemin, ol ábden sharshaǵanyna qaramastan eńbek ete berdi», - deıdi Gúlmaıra Eslıamova.
Samaldyń ápkesi Aıagóz Satına Samalmen WhatsApp arqyly habarlasty.
«Samal «Men sener-senbesimdi bilmeı turmyn!» dep jazdy. Osy ǵana. Sharshaǵan, árıne, tolqyp tur. Samal bul jetistikke óz eńbegimen jetti. Men úshin onyń baqytty, deni saý bolǵany mańyzdy. Biz ony taǵatsyzdana kútip otyrmyz», - deıdi aktrısanyń ápkesi.
2004 jyldan beri Samal Máskeýde turyp jatyr, biraq ata-anasyna jıi kelip turady. Endi aty álemge áıgili aktrısany onyń ákesi men sheshesi jaz aıynda keledi dep kútip otyr.
Aıta keteıik, qazaqstandyq aktrısa Samal Eslıamova 71-shi Kann festıvalinde Sergeı Dvoretskııdiń «Aıka» fılminde eń úzdik áıel rólin jeńip aldy.
