Kann festıvali: Qazaqstan pavılonynda Samal Eslıamovamen kezdesý uıymdastyrylady
«Dostar, búgin 72-shi Halyqaralyq Kann festıvali aıasynda Qazaqstannyń ulttyq pavılony óz jumysyn bastaǵanyn qýanyshpen habarlaǵym keledi. Ózderińiz biletindeı, biz Kanndaǵy qazaqstandyq pavılondy 2017 jyly 70-shi Kann kınofestıvalinde usyndyq jáne ony elimizdiń Táýelsizdiginiń 25 jyldyǵyna arnaǵan edik. Osy ýaqytqa deıin Kann kınofestıvaline Reseı pavılonynda óz stendterin ornatqan Qazaqstan rejısserleri qatysty. Ótken jyly Kanndaǵy pavılonnyń jumysy Astananyń 20 jyldyǵyna oraı uıymdastyryldy», - dedi mınıstr.
Onyń atap ótýinshe, bıylǵy jyly qazaqstandyq pavılonnyń jumysynda 15-ten astam is-shara ótedi. Onyń ishinde rejısser Sergeı Dvortsevoı jáne 2018 jylǵy Kann festıvalindegi úzdik áıel róliniń ıegeri, maqtanyshymyz Samal Eslıamovamen kezdesý uıymdastyrylmaq. Sonymen qatar Qazaq ulttyq óner ýnıversıteti «Kıno jáne TV» kafedrasynyń tusaýkeseri ótip, kórkem óner salasyndaǵy prezentatsııalar men zertteýler, Qazaqstandaǵy derekti jáne ómirbaıandyq kınolar, Almaty film festival jáne «Ushqyn» stýdenttik kınofestıvaline qatysqan kınorejısserler Aıan Naızabekovtyń «Tolǵaý», Erlan Nurmuhambetovtyń «Mahabbat kúnderi», Ánýar Raıbaevtyń «Aqıqat sáti», Tólegen Baıtýkenovtyń «Native Brothers» tolyq metrajdy jobalary tanystyrylady.
«Qazaqstandyq kınonyń álemdik úzdik kınofestıvalderdegi sońǵy úlken jeńisteriniń arqasynda álemdik óndirýshiler men kıno ındýstrııasy salasyndaǵy mamandardyń shynaıy qyzyǵýshylyǵyn týdyrýy biz úshin úlken qýanysh. Áriptesterime pavılon jumysyna tabys, jańa jemisti kezdesýler, kelisimsharttar men yntymaqtastyq tileımin! Júregim sizdermen birge! Al barlyǵymyzǵa jaqsy ári sapaly kıno jáne qazaqstandyq taspalardyń jańa jeńisterin tileımin, dostarym!»,- dedi Arystanbek Muhamedıuly.
