Kann festıvali aıasynda Qazaqstannyń ulttyq pavılony tanystyryldy
ASTANA. QazAqparat - Elimizde kınematografııa tarıhynda alǵash ret Qazaqstannyń Ulttyq kınopavılony ashyldy. Atalǵan is-shara Kann festıvaliniń 70-shi mereıtoılyq datasyna oraılastyryldy. Atalǵan kınopavılonnyń baǵdarlamasynda basty oryndy Astanada QR Mádenıet jáne sport mınıstrliginiń tapsyrmasy boıynsha EKSPO-2017 aıasynda 2017 jylǵy 22-28 shilde kúnderi ótetin «Eýrazııa» Halyqaralyq kınofestvaliniń tusaýkeseri aldy.
Atap aıtsaq, Ulttyq pavılon jumysynyń aıasynda XIII «Eýrazııa» Halyqaralyq kınofestvaline daıyndyq sharalary pysyqtaldy. Bul rette Astanadaǵy ortaq is-sharalar aıqyndalyp, kınopavılon jumysy barysynda kórsetiletin fılmder iriktelip alyndy.
Aıta keteıik, 2017 jyldyń 17 mamyrynda Frantsııanyń Kann qalasynda 70-mereıtoılyq kınofestıval óz jumysyn bastady. Festıval aıasynda qurylǵan komıssııa eki myńǵa jýyq tolyqmetrajdy fılmder arasynan komıssııa bıyl 150-ge jýyq týyndyny tańdap alǵan. Al baıqaýdyń basty syılyǵy - «Altyn palma butaǵy». Ony ıelený úshin bul joly synǵa 18 kartına túsedi.
Qazaqstannyń Ulttyq kınopavılonynyń ashylýy otandyq kınematografııa úshin buryn sońdy bolmaǵan tyń serpilis. Álbette, bul bastama qazaqstandyq týyndylardyń halyqaralyq alańǵa shyǵýdyń múmkindigi bolyp tabylady. Festıvaldyń eki apta boıy qazaqstandyq kınematografısterdiń jumystaryn kórsetý sharalary ótkiziledi. Oǵan qosa, fılmder, jobalar men qyzmetterdi jarnamalaý úshin kásibı kezdesýler men kelissózder ótkizý maqsatynda biregeı alań usynyldy. Pavılon elimizdiń kınoındýstrııa qatysýshylary, ıaǵnı kınoóndirýshiler, rental stýdııalar, kınojeliler, mádenıet jáne týrızm salasyndaǵy úkimettik jáne úkimettik emes uıymdar úshin ashyq bolady. Qazaqstan pavılonyndaǵy katalogtarda otandyq kınoındýstrııa ókilderi týraly meılinshe tolyq aqparat ornalastyryldy Sondaı-aq, pavılonnyń LED ekrandarynda otandyq fılm treıleri, joba tızerleri men kompanııalar týraly vıdeorolıkter úzdiksiz kórsetilip turady. Sol sııaqty Qazaqstandaǵy túsirilimderdiń múmkindikteri men túrli tabıǵı landshaftar týraly vıdeorolıkter de pavılon kórermenderiniń nazaryna usynylady.
Esterińizge sala keteıik, 19 mamyr kúni La Plagedu Grayd'Albion mekenjaıy boıynsha Kannydaǵy Frantsııanyń Ulttyq kınematografııa ortalyǵynyń alańynda Qazaqstan pavılonynyń ashylýy boıynsha resmı qabyldaý ótti. Saltanatty keshtiń kontserttik baǵdalamasynda Qazaq ulttyq óner ýnıversıtetiniń kameralyq ishekti aspaptar ansambliniń súıemeldeýimen Aıman Musaqojaeva men halyqaralyq tanymaldydyqqa qol jetkizgen, mıllıardtardyń kózaıymyna aınalǵan qazaqstandyq oryndaýshy Dımash Qudaıbergen óner kórsetti. Sondaı-aq, bul rásimge Kann kınofestıvaliniń jáne kınonaryqtyń basshylary, qonaqtary men qatysýshylary, QR Mádenıet jáne sport mınıstrliginiń, Frantsııadaǵy QR elshiligi, Kann qalasynyń basshylyǵy men kınokomıssııa ókilderi, óner jáne bıznestiń tanymal qaıratkerleri, barlyǵy 500-ge jýyq qatysýshy shaqyryldy. Aıta keteıik, kesh barysynda Kann qalasyndaǵy Frantsııa Ulttyq kınematografııa ortalyǵynyń úlken ekranynda elimizdiń baı tabıǵı landshaftary beınelengen kınotýyndylardyń úzindileri kórsetildi. Sonymen qatar atalǵan fılmder kórermenderge Qazaqstannyń búgingisi men ótken tarıhyn tamashalaýǵa úlken múmkindik týdyrdy. Resmı qabyldaýdyń negizgi ári alǵashqy sharasy -halyqaralyq Kann kınofestıvaliniń bedeldi alańynda Qazaqstan pavılonynyń tanystyrylymyn ótkizý boldy.
