Qanysh Sátpaevtyń 125 jyldyǵy: arnaıy bezendirilgen poıyz jolǵa shyqty
ASTANA. KAZINFORM – «Qazaqstan temir joly» UK» AQ Qanysh Sátpaevtyń 125 jyldyǵyna oraı bezendirilgen jolaýshylar poıyzyn jolǵa shyǵardy.
Ǵalymnyń ómir joly Jezqazǵan qalasymen tyǵyz baılanysty bolǵandyqtan, onyń sýreti № 65/66 «Astana-Jezqazǵan» baǵytyndaǵy poıyzǵa beınelengen. Ol tamyz aıynyń sońyna deıin kúnara qatynaıtyn bolady.
Qazaqtyń kórnekti qaıratkerlerine arnalǵan taqyryptyq jobany Ulttyq tasymaldaýshy «Qazaqmys» kompanııasymen birlesip alǵash ret iske asyryp otyr. Poıyzdyń syrtqy jaǵynda Qanysh Sátpaevtyń ómir súrgen jyldary men onyń mereıtoılyq portreti beınelengen. Joba uly qazaq ǵalymynyń esimin qasterleýge baǵyttalǵan.
Aıta keteıik, jyl basynda senatorlar tuńǵysh qazaqstandyq geolog-akademıktiń mereıtoıyn joǵary deńgeıde atap ótýdi usynǵan.
Keıin Ulttyq bank Qanysh Sátbaevtyń 125 jyldyǵyna arnalǵan monetalardy aınalymǵa shyǵarady.
Altynbek Ámıt
