Qanysh Sátbaev kanalynan Shiderti alqabyna sý bosatyla bastady
PAVLODAR. KAZINFORM — Mamandar Ekibastuzdyń aýyldyq aımaǵy men Aqtoǵaı aýdany boıynsha 21 myń gektardan astam shabyndyqty sý basady degen úmitte.
Pavlodar oblysynda Shiderti ózenine sý jiberile bastady. Jyl saıynǵy dástúrli shara aıasynda Ertis ózenine jalǵanǵan Qanysh Sátbaev atyndaǵy kanaldan úlken kólemde sý bosatylady. Bul Aqkól-Jaıylma alqabyndaǵy ekojúıeni qalpynda saqtap, aýyl sharýashylyǵy salasyn qajetti mólsherde jem-shóppen qamtamasyz etedi.
— Búgin, 4 sáýirde ońtaıly aýa raıy jaǵdaılary men topyraq ylǵaldylyǵynyń jaı-kúıin eskere otyryp, Qanysh Sátbaev atyndaǵy kanaldan Shiderti ózenine tabıǵatty qorǵaý jáne sanıtarlyq-epıdemıologııalyq sý jiberýler bastaldy. Bekitilgen kólem 120 mln tekshe metrdi quraıdy. Jalpy, sý jiberý esebinen Ekibastuz qalasynyń aýyldyq aımaǵy men Aqtoǵaı aýdanynda ornalasqan 21 myń gektardan astam shabyndyq alqaptaryn sý basady dep boljanyp otyr. Sý jiberýlerdiń barlyq kezeńin merdiger uıym jáne oblys ákimdigi baqylaıtyn bolady, — dep habarlady oblys ákiminiń orynbasary Áıgerim Qabyltaeva.
Buǵan deıin Sátbaev kanalynan Shiderti ózeni jaıylmasyna rekordyq kólemde sý jiberiletini týraly jazǵanbyz. Bıylǵy sýdyń kólemi ótken jylmen salystyrǵanda 33,3 mln tekshe metrge kóp.
Al Shyǵys Qazaqstandaǵy sý qoımalarynan Ertis ózenine sý bosatý 8 sáýirde bastalady. Bıyl onyń kólemi de ulǵaıyp, 7 mlrd tekshe metrden kem bolmaıdy dep kútilip otyr.