Qanysh Sátbaev atyndaǵy kanalda 19 sorǵy agregaty jańartylady
ASTANA. KAZINFORM — Pavlodar oblysynda Qanysh Sátbaev atyndaǵy kanal men birqatar sý sharýashylyǵy nysandaryn jańǵyrtý jumystary júrip jatyr. Joba aıasynda sorǵy agregattary men transformatorlar aýystyrylyp, «Ertis-Ýspenka» kanaly qaıta jóndelýde. Bul óńirdi sýmen qamtamasyz etý senimdiligin arttyrýǵa baǵyttalǵan. Bul týraly Sý resýrstary jáne ırrıgatsııa mınıstrligi málim etti.
Sý resýrstary jáne ırrıgatsııa vıtse-mınıstri Jandos Sálimov jumys saparymen Pavlodar oblysyna baryp, óńirde júzege asyrylyp jatqan negizgi sý sharýashylyǵy jobalarynyń oryndalý barysyn tekserdi.
Atap aıtqanda, vıtse-mınıstr Qanysh Sátbaev atyndaǵy kanaldaǵy sorǵy agregattaryn jańǵyrtý jáne № 87 bógetti rekonstrýktsııalaý jumystarynyń, sondaı-aq «Ertis-Ýspenka» kanalyn rekonstrýktsııalaý jobasy qalaı júzege asyrylyp jatqanyn kórdi.
Nysandardy aralaý kezinde Jandos Sálimov merdiger uıymdardyń ókilderimen kezdesip, qolǵa alynǵan jobanyń barlyǵyn belgilengen merzimde ári sapaly aıaqtaýdy tapsyrdy.
— Bul jobalardyń júzege asyrylýy gıdrotehnıkalyq nysandardyń senimdiligin arttyrýǵa, turǵyndar men aýyl sharýashylyǵy taýaryn óndirýshilerdi sýmen qamtamasyz etý sapasyn jaqsartýǵa, sondaı-aq óńirdegi sý resýrstaryn tıimdi paıdalanýǵa múmkindik beredi. Aýqymy men mańyzyn eskere otyryp, mınıstrlik bul jobalardyń iske asyrylý barysyn turaqty baqylaýda ustap otyr, — dedi Sý resýrstary jáne ırrıgatsııa vıtse-mınıstri.
Qanysh Sátbaev atyndaǵy kanaldy jańǵyrtý jónindegi Jol kartasyna sáıkes nysanda 19 sorǵy agregaty men 17 transformatordy aýystyrý kózdelgen.
Qazirgi ýaqytta 5 sorǵy agregatyn aýystyrý jumystary aıaqtalý kezeńine jaqyndady. Jaqyn arada taǵy 5 agregatty rekonstrýktsııalaý jumystary bastalady.
Sonymen qatar kanaldyń energetıkalyq ınfraqurylymyn jańǵyrtý aıasynda josparlanǵan 17 transformatordyń 8-i ornatyldy.
Jol kartasynyń tolyq oryndalýy kanal jumysynyń senimdiligi men tıimdiligin arttyryp, tutynýshylardy sýmen úzdiksiz qamtamasyz etýge, sondaı-aq gıdrotehnıkalyq nysandardy paıdalaný táýekelderi men olardy kútip-ustaýǵa jumsalatyn shyǵyndardy azaıtýǵa múmkindik beredi.
Aıta keteıik, bıyl Qazaqstanda 283 ırrıgatsııalyq kanal avtomattandyrylady.
