Qanysh Sátbaev atyndaǵy kanalda 19 sorǵy agregaty men 17 transformator aýystyrylyp jatyr
ASTANA. KAZINFORM — Memleket basshysynyń tapsyrmasyn oryndaý aıasynda Sý resýrstary jáne ırrıgatsııa mınıstrligi Qanysh Sátbaev atyndaǵy kanaldy jańǵyrtý jumystaryn jalǵastyryp jatqanyn jarııalady.
2028 jylǵa deıin nysanda 19 sorǵy agregaty men 17 transformatordy aýystyrý josparlanǵan. Qazirgi ýaqytta 5 sorǵy agregatyn aýystyrý jumystary aıaqtalýǵa jaqyn. Taǵy 5 jabdyqty rekonstrýktsııalaý jumystary bastaldy.
Energetıkalyq ınfraqurylymdy jańǵyrtý aıasynda transformatorlardy aýystyrý jumystary da júrgizilip jatyr. Búginde josparlanǵan 17 transformatordyń barlyǵy satyp alyndy. Onyń 4-eýi ornatyldy.
Qanysh Sátbaev atyndaǵy kanal Qaraǵandy jáne Pavlodar oblystaryn, sondaı-aq Astana qalasyn ónerkásiptik jáne aýyz sýmen qamtamasyz etedi. Kanal sýy ónerkásip, energetıka jáne aýyl sharýashylyǵy qajettilikterine paıdalanylady. Nysannyń jalpy uzyndyǵy – 458 shaqyrym.
– Barlyq jumys bekitilgen keste men nysandy jańǵyrtý jónindegi Jol kartasyna sáıkes júrgizilip jatyr. Jobany iske asyrý Qanysh Sátbaev atyndaǵy kanaldyń jumys senimdiligi men tıimdiligin arttyrýǵa, tutynýshylarǵa sýdyń úzdiksiz berilýin qamtamasyz etýge, sondaı-aq paıdalaný táýekelderi men gıdrotehnıkalyq qurylystardy kútip-ustaýǵa jumsalatyn shyǵyndardy azaıtýǵa múmkindik beredi, – dedi Sý resýrstary jáne ırrıgatsııa vıtse-mınıstri Jandos Sálimov.
Aıta keteıik, Atyraýdaǵy Erik-Mostovoı kanalynyń máselesi birneshe jyldan beri sheshimin tappaı keledi. Qazir kanaldyń keı bóligin qalyń shóp basyp, ishinde sasyq sý jınalǵan. Qoqys ta kóp. Buǵan deıin nysandy qaıta jańǵyrtý josparlanǵan. Jańa jobanyń shekti quny 31 mlrd 669 mln teńge dep belgilengenimen, qurylystyń naqty qashan bastalatyny ázirge belgisiz.
